Алматыда 56 бала коронавирустан емделіп жатыр

Аймақтар • 30 Мамыр, 2020

Алматыда 56 бала коронавирустан емделіп жатыр

25 рет көрсетілді

Өткен тәулікте Алматыда COVID-19 вирусын жұқтырған жаңа 37 жағдай анықталды.

Статистика бойынша Алматыда пандемия басталғаннан бері коронавирус инфекциясын жұқтырудың расталған 2499 жағдайы тіркелді.

Жаңадан жұқтырғандардың төртеуі жергілікті азаматтар. Қауіпті індет оларды профилактикалық мақсатта тексерген кезде анықталған. Тағы 4 азаматтан қалалық стационарларға жатқызу кезінде табылды. Қалған адамдар науқастармен байланыста болған жандар.

Стационарларға емдеуге жатқызылған барлық науқас коронавирустық инфекцияның таралуына жол бермеу мақсатында, талдау нәтижелері шыққанға дейін бақылауда болатындығын айта кеткен жөн.

Медицина қызметкерлері жедел келіп түсетін және шұғыл операция жасауды қажет ететін науқастарға операцияларды жеке қорғану заттарын киіп жасайды. Одан кейін олар да талдау нәтижелері шыққанға дейін жеке бөлмелерде болады.

Диагноз расталған жағдайда, бөлімшеде дезинфекциялық тазалау жұмыстары жүргізіледі.

Қазіргі уақытта инфекция жұқтырған 1038 адам қаланың жұқпалы аурулар стационарларында коронавирустық инфекциядан емделуде, оның ішінде 56 бала бар.

«Қосымша ауруларының болуына байланысты 4 адамның жағдайы өте ауыр, 22 пациент – ауыр хәлде, 304 науқастың жай-күйі – орташа дәрежеде. Ал қалған емделушілердің жағдайы қанағаттанарлық. Жалпы, науқастардың басым көпшілігінде ауру симптомсыз өтуде деп айтуға болады», – деді Алматы қаласы Қоғамдық денсаулық басқармасының басшысы Тілеухан Әбілдаев.

Оның айтуынша, провизорлық госпитальдарда – 177 адам, карантиндік оқшаулауда – 139 адам және үй карантинінде 14 339 азамат бар.

Кеше Алматыда коронавирустық инфекциядан сауығып, 76 адам емханадан шығарылды. Бүгін тағы 30-дан астам адамды емдеуден шығару жоспарлануда.

Жалпы, Алматыда пандемия басталғаннан бері 1451 азамат сауығып шақты. Бұл – мегаполисте тіркелген, вирус жұқтырған адамдардың жалпы санының 59 пайызы.

«Қалада карантин сақталуда. Мен тұрғындарды барлық карантиндік шараларды, әлеуметтік қашықтық пен бетперде тағу режимін сақтауға шақырамын», - деп қорытындылады Тілеухан Әбілдаев.

Күннің маңызды және өзекті жаңалықтарын «Егемен Қазақстан» телеграм каналынан оқыңыз