Парламент • 01 Маусым, 2020

Сенаторлар әскери жағдай мәселелеріне қатысты заң жобасын талқылады

20 рет көрсетілді

Сенаттың Халықаралық қатынастар, қорғаныс және қауіпсіздік комитетінің кеңейтілген отырысында «Қазақстан Республикасының кейбір заңнамалық актілеріне соғыс жағдайы мәселелері бойынша өзгерістер мен толықтырулар енгізу туралы» заң жобасы қаралды. Бұл туралы Сенаттың баспасөз қызметі хабарлады.

Отырыста негізгі баяндаманы Қазақстан Республикасы Қорғаныс министрінің бірінші орынбасары – Қарулы Күштер Бас штабының бастығы Мұрат Бектанов, ал қосымша баяндаманы Сенат депутаты, комитет мүшесі Нұржан Нұрсипатов жасады.

Заң жобасының негізгі мақсаты – соғыс жағдайында мемлекет функцияларының тетіктерін болжалды әскери қауіп-қатерлерді және жаңа заманғы әскери қақтығыстар формасы мен тәсілдерінің өзгеруін есепке ала отырып жетілдіру.

Сенатор Н. Нұрсипатовтың сөзінше «Заң жобасының басты жаңалығы өңірлерде қорғаныс кеңестерін құру болып саналады, бұл, өз кезегінде, жергілікті атқарушы органдардың жауапкершілігін арттырады. Сонымен қатар, жоғары оқу орындарында ақылы негізде запастағы сержанттарды даярлау көзделген, бұл жұмылдыру резервін нығайту қажеттілігінен туындап отыр».

Заң жобасы Еңбек кодексіне, «Жұмылдыру дайындығы мен жұмылдыру туралы», «Мемлекеттік құпия туралы», «Соғыс жағдайы туралы», «Қазақстан Республикасының Қорғанысы және Қарулы Күштері туралы», «Білім туралы» және «Әскери қызмет және әскери қызметшілердің мәртебесі туралы» заңдарға түзету енгізуді  көздейді.

Құжат Палата қарауына жолданды.

Сондай-ақ, кеңейтілген отырыста сенаторлар ел Қарулы Күштерінің одан әрі даму мәселесін жан-жақты талқылады. Оның барысында әскери білім жүйесін және әскери ғылымды, кадр даярлауды жетілдіру, әскери тәртіп пен құқықтық тәртіп жағдайы, әскери қызметшілерді әлеуметтік қамтамасыз ету және Қарулы Күштердің бітімгерлік қызметі туралы мәселелер көтерілді.

Соңғы жаңалықтар

COVID-19: Хаттамаға өзгеріс қажет пе?

Қазақстан • Бүгін, 09:25

Ел жүрегі – елорда

Аймақтар • Кеше

Ұқсас жаңалықтар