Қоғам • 03 Маусым, 2020

Қалталылар қауіпті індеттен қалай қорғанады?

90 рет көрсетілді

Ауру адам талғамайтынына тағы бір мәрте көзіміз жетті. Коронавирус бай мен кедейді бірдей әлекке салуда. Осы күнге дейін қаржысына сенген қалталылар пандемия алдында қауқарсыз. Шетел асып шипа іздейтіндер ауылға қарай ауа көшті. Індеттің оты тұтанған қалалардан қашқан халықтың санында шек болған жоқ. Блок-бекеттерден өткен қымбат көліктерге қарап-ақ, ақшаның ажалға араша болмайтынын түйсіндік. Әйтсе де атқамінерлер бұған да амал тапқан көрінеді.

Бункерлер, жеке ұшақтар мен реанимациялар. Бүгінгі әлем байларының үрейіне араша, өміріне өзек болатын құнды мүліктердің қата­рында. Оған механикалық желдеткішті қосыңыз. Құ­ны теңгеге шаққанда 1,5 млн-нан басталып 15 млн-ға дейін жететін ауа тазартатын апараттар бүгінде үл­кен сұранысқа ие. Вирус жұқ­тырған жағдайда бұл баға зәу­лім үйлері мен кеңселерін емхана есебінде пайдаланып, медициналық құралдармен жабдықтауды ойлаған дәулет­тілерді шошыта алған жоқ. Қабат-қабат долларларын ден­саулығы үшін құрбан еткен ауқаттылардың бұл ісі ал­дымен өздерінің көңіліне демеу болса, екіншіден ел эко­номикасын дағдарыстан құтқарудың төте жолындай көрінді.

Иә, бұл негізінен дәл осы күрделі кезеңде экономикасын тұралатпауға тырысқан мемлекеттердің байлығын банкке басқандардан ақша суырудың амалы сынды. «Жеке ұшақты жалға алы­ңыз!», «VIP бөлмеге төле­ңіз!», «Миллиондарды жел­дет­кішке жұмсаңыз!» секілді пафосқа толы жарнамалар әлеу­меттік желіде желдей есіп, жаңбырдан кейінгі саңы­рауқұлақша қаптады. Әрине, жылтыраққа жаны құштар жақыбайлар Үкімет ұсынған тауарға магниттей жабысу­да. Жапатармағай жабыла са­тып алып жатыр. Тіпті ал­ды 8 айлық кезекте тұрған кө­рі­неді. Мәселен, Ресейде хи­рур­гия, реанимация жабдықтарын са­татын компаниялар жеке тұ­тынушылардан түскен сұ­ра­ныстардың көптігін ха­бар­лады. Америкалық өн­ді­рушілер соңғы кезде пор­та­тивті желдеткіштерге қызы­ғушылықтың артқанын айтады. Ал италиялық дәрігерлер құрылғы жетіспей жатқанына наразы. Кейбір дамушы мемлекеттер жан сауғалар жер таппай әлекке түсуде.

Мамандар ауруханадан тыс реанимациялық бө­лім­шелер құру мүмкін емес­тігін түсіндіріп ба­ғу­да. Алайда оған тұты­ну­­шылар көнер емес. Дүние­жүзілік денсаулық сақтау ұйы­мының мамандары үй­дегі желдеткіштердің көмек­теспейтініне сенімді. Қатты ауырған науқас қарқынды терапия мен үнемі медициналық бақылауды қажет етеді. Бұл пікірді отандық дәрігерлер де құптап отыр.

Ойлап қараңыз, бункер­лердің бағасы 60 млн тең­геден басталады. 30 млн-ға бөлмені бактериялардан сақ­тайтын арнайы брондалған есіктер мен терезелер сатып алуға мүмкіндік бар. Әлем басылымдары «Нью-Йорк­тегі элита арасындағы шынайы шайқас – аурухана төсегін резервтеу», деп жазуда. Осыдан-ақ қоғамның жай-күйін аңдауға болатындай. Ақша не істетпейді деп абдырап қаласыз.

Ка­рантин кезінде жеке әуе­компанияларының жұмы­сы жандана түскендей. Олар­дың қызметіне күннен-күнге сұ­ра­ныс артып келеді. Тұты­нушыларды қызықтыру үшін Флорида штатындағы «South Jet» чартерлік компаниясы «Өзіңізді коронавирустан қор­­ғаңыз – жеке ұшақта ұшы­ңыз. Бүгінгі кітап!» жобасын қолға алған. Ірі компаниялар мен ауқатты отбасылар вирус жұқтырмау үшін жеке ұшақ­тарды жиі пайдаланады. Мәселен, Гонконгтан бір отбасы Балиге, ал Голливуд киностудиясы Токиодан Лос-Анджелеске 50 адамға рейс ұйымдастырыпты. Нью-Йорк­тен Лондонға бару үшін 12 жолаушы сиятын шағын ұшақтар шамамен 140 мың АҚШ доллары тұрады. Толық жүктеме кезінде бір адамға 12 мың АҚШ долларынан келеді. Сонымен қатар адамдар өзін-өзі оқшаулау үшін яхта­ларды жалдап, теңізге саяхаттауда. Бір айлық азық-түлігін алып, отбасымен елден жыраққа кеткендердің де қарасы мол.

Ал Қазақстанның байлары қайтті екен деген сауал сізге де маза бермей тұрған болар. Әрине, бұл сұрақтың жауабы аса қиын да емес. Бұл жолы байлар жаз шыға ғана демалуға баратын қала сыртындағы зәулім үйлеріне ерте көктемде жайғасты. Қым­бат антисептиктер мен тұмауға қарсы дәрі-дәрмек­терді үйіп-төгіп алған ел азаматтары вирустан осылайша қорғануды жөн деп санаған сыңайлы.

Аллаға шүкір, біздегі ахуал шетелдегідей шектен шы­ғып тұрған жоқ. Содан да бо­лар, Еуропадан өріс ізде­ген қазақтар елге оралып жатыр. Бізге қызығы, олар індет жайлаған Еуропаға биыл бара қояр ма екен?

 

Соңғы жаңалықтар

COVID-19-дан барлығы 375 адам қайтыс болды

Коронавирус • Бүгін, 08:54

Жауапкершілік танытайық

Пікір • Бүгін, 07:35

Табиғатты аялауға үйретейік

Экология • Бүгін, 07:30

Отандық өндіріс көлемі артады

Медицина • Бүгін, 07:19

Атырауға жедел жәрдем керек

Аймақтар • Бүгін, 07:13

Қарға адым жер мұң болған...

Қоғам • Бүгін, 06:40

Айя Софияда азан шақырылады

Руханият • Бүгін, 06:35

Салмағы 92 грамдық принтер

Технология • Кеше

Қашықтан оқып, тіл үйрен!

Білім • 11 Шілде, 2020

Ұқсас жаңалықтар