Облыс әкімі Өмірзақ Шөкеев­тің бақылауындағы төтенше жағдайдың салдарын жою, қалпына келтіру жұ­мыс­тары Мақтаарал ауданының орталығы Мырзакент кентінде өткен кеңейтілген мәжілісте талқыланды. Облыстық мәс­ли­хаттың хатшысы Қайрат Балабиев, Nur Otan партия­сы облыстық филиалы төр­аға­сының бірінші орынбасары Бейсен Тәжібаев, облыстық бас­қарма басшылары, Жетісай, Шардара, Сарығаш, Келес ауданы әкімдерінің орынбасарлары қатысқан жиында негізгі 5 мәселе қаралды.

Бүгінде аудандағы эвакуа­ци­я­лық 8 бекетте 996 адам орна­ласқан. Оның 79-ы  Жаңа­тұрмыс, 407-сі Жеңіс, 345-і Фир­доуси, 165-і Өргебас ауыл­да­рының тұрғындары. Бекет­терде санитарлық талап­тар­ды сақтау шаралары қарас­ты­рылып, аспаздар күнделікті медициналық тексеруден өт­кізілуде. «Жеңіс елді мекенінде 1 мың долларға 273 отбасының құжаты қабылданып, облыстық қаржы басқармасына тапсырылды. Сонымен қатар жалпы 323 отбасының 301-інен құжат жинақталып, карточкалары табысталды. Жеңіс елді мекенінде жалпы тұрғын үй саны – 257, соның ішінде 204 тұрғын үйдің құжаты жиналып, Мақтаарал аудандық құрылыс бөліміне тапсырылды», деді Шардара ауданы әкімінің орынбасары Бауыржан Шомпиев.

Облыстық құрылыс басқармасы басшысының орынбасары Тәжібай Егетаев бүгінде Мырзакент маңындағы жаңа шағын ауданда  құрылыс қарқынды жүргізіліп жатқанын жеткізді. Зардап шеккен әлеуметтік нысандар жаңадан салынады. Яғни Фирдоуси және Өргебас елді мекендері мен Мырзакент кентінде заманауи фельдшерлік-акушерлік пунктінің құрылысы мен 1200 орындық мектеп, полиция тірек пункті және 280 орындық балабақша құрылысы басталады. Бұл мақсатта облыс әкімдігі резервінен қаржы қарастырылады. Бүгінде Жеңіс, Жаңатұрмыс, Достық елді мекен тұрғындарының келісімі бо­йынша Мырзакент кентінде 425 жеке тұрғын үйдің құрылысы жүргізілуде. Соның ішінде 235 тұрғын үй мемлекеттік бюджет есебінен, қалған 190 үйдің 150-і «Б.Өтемұратов», 20-cы «Салиқалы ұрпақ», 20-cы «Біз біргеміз!» қорларының демеушілігімен салынуда. Жалпы 839 тұрғын үйге аккредиттелген сарапшылар тарапынан техникалық зерттеу жұмыстары жүргізіліп, 623 үйге қорытынды алын­ған. Қазіргі таңда 188 үйдің іргетасы құйылып, 73-інің қа­бырғасы көтерілуде. Сондай-ақ бір үйдің шатыры жабылуда. Бұл жұмыстармен 37 мердігер компания мен 1334 құрылысшы айналысуда. Мә­жіліс барысында Жаңажол ауыл­дық округі Өргебас, Фирдоуси ауылдарын қалпына келтіру жұмыстарының да есебі тыңдалды. «Түркістан» кор­поративтік әлеуметтік даму қорының төрағасы Жан­дос Орынбаевтың айтуынша, бүгінде Фирдоуси және Өрге­бас ауылынан 400 тоннаға жуық қоқыс шығарылған. Фир­доу­сиде 100 үй, Өргебаста 55 бас­пана толығымен бұзыл­ған. Сондай-ақ тұрғын үй құ­ры­лысына Өргебас ауылының 156, Фирдоуси ауылындағы 183 отбасының әрқайсысына 17 млн теңгенің 50 пайызы, яғ­ни, 8,5 млн теңгесі толық ауда­рылған.

Су басудың салдарынан зардап шеккен азаматтарға төленетін өтемақылар туралы баяндаған облыстық Қаржы және аудит мемлекеттік активтер басқармасының басшысы Абдрахман Тасыбаев зардап шеккен тұрғындарға Ә.Усманов қорынан 5 млн 202 мың АҚШ доллары 5202 отбасының (30 420 адам) есепшотына аударылып жатқанын жеткізді. Бүгінде бұл қаржыны 1308 отбасы алып үлгеріпті. Сондай-ақ тұрғындарға 4638 банк картасының 90 пайызы таратылып берілген. Ал 650 млн теңге әр отбасына Үкіметтің резервінен 100 мың теңгеден беру мақсатында бөлініп отыр. Ол аудан әкімдігінің мәліметіне сәйкес, 846 үйдің 6128 адамына беріледі.

Ауыл шаруашылығы бас­қармасы басшысының орынбасары Тұрғанбек Оспанов су тасқыны кезінде Мақтаарал ауданындағы 10 елді мекеннің 994 агроқұрылымына тиесілі 5624,8 гектар егістік алқабына зақым келгенін айтып өтті. Соның бүгінде 1893,2 гектары қайта өңделіп, 1545 гектарына түрлі ауыл шаруашылығы дақылдары егіліпті. Сондай-ақ қазіргі таңда 22 азаматқа тиесілі 144 бас ауыл шаруашылығы жануарлары анықталып, өтем­ақы тағайындалуда.

Жиын қорытындысы бо­йынша топан судың салдарын жою бағытындағы жұ­мыс­тарды күшейту, соның ішінде эвакуа­циялық бекеттердің, Мырза­кент маңындағы жаңа шағын аудандағы құры­лыс жұмыс­тарының қарқы­нын бәсеңдетпеу, су басқан ауыл тұрғын­дарының өтемақы­ларын тездетіп төлеу, Өргебас, Фир­доуси ауылдарындағы қалпына келтіру жұмыстарын назарға алу қажеттігі айтылды.

Түркістан облысы