«Біздегі мектеп басшыларының жалақысы - үлкен проблема. Бұл проблеманы жоққа шығаратын әріптестеріміз де бар. Шын мәнінде менеджмент мәселесіне көп сұрақтар тиесілі. Сондықтан осы мектеп басшыларының біліктілігі, білімділігі және олардың тиісті жалақы алуы мен жұмысқа алу механизмі өзгеруі тиіс. Қазіргі уақытта біздің директорлардың жалақысы өте аз, жеткіліксіз. Біріншіден, биылғы жылы және 4 жылдың ішінде 2 есе өседі. Екіншіден, енді директорларды және олардың орынбасарларын аттестаттаудан өткізу институты енгізіліп жатыр. Ол дегеніміз – енді біздің директорлар мен орынбасарлары өздерінің жұмыстарының тиімділігін көрсеткен жағдайда ай сайын өздерінің алатын жалақысына 30-дан 100 пайызға дейін қосымша үстемақы алатын болады», - деді министр.
Министрдің айтуынша, мектеп директорлары мен орынбасарлары осы жүйемен тест тапсырып, нәтижесінде олардың алдағы жұмыс жоспары бекітіледі.
«Осы жүйе бойынша тиісті нормативтік-құқықтық актілерді дайындадық. Осы айдан бастап мектеп директорлары мен орынбасарлары аталған жүйемен тест тапсырып, оның нәтижесінде кейбір директорларды орнынан алып тастау мүмкіндігі болады. Кейбіреулерін өзгертіп, басқа мектепке тағайындау мүмкіндігі болады. Тиімді жұмыс істеп жүрген басшылар тиісті үстемақыларын алып, әрі қарай жұмыстарын жалғастырады», - деді Асхат Аймағамбетов.
