Өргебас және Фирдоуси ауылдарындағы кездесу барысында облыс әкімі жауапты қызметкерлерге апаттан жапа шеккен тұрғындардың өтемақыларын тездетіп төлеуді, ауылдарды қалпына келтіру жұмыстарын жеделдетуді жүктеді. Қираған үйлерді бұзып, құрылыс материалдарын тасымалдауға Өзбекстан елінің Төтенше жағдайлар жөніндегі министрлігі тарапынан да көмек күші жұмылдырылған. Өргебас ауылындағы 197 үйдің барлығы жаңадан салынады. Бүгінде 20-ға жуық үйдің іргетасы қаланып, қабырғасы көтерілген. Су шайған ауылдардың барлығында инфрақұрылым толығымен жаңартылуда. Өргебас және Фирдоуси ауылдары тұрғындарының 70%-ы жаңа үй құрылысына берілетін 17 млн теңге қаражаттың жартысын, яғни 8,5 миллион теңгені алған.
Фирдоуси ауылының тұрғындары облыс әкімімен кездесуде дер кезінде қолға алынған шаралардың оң нәтиже бергенін айтып, алғыстарын жеткізді. Ауылда 320 тұрғын үй болса, оның жартысынан астамына үй тұрғызуға қажетті қаражат берілген. Ауылда апаттан зардап шеккен баспаналар бұзылып, жаңа үйлер салынуда.
