Қазақ күй өнерінің кешелі-бүгінгі көрнекті өкілдерінің бірі, Қазақстанның Халық әртісі, бұған дейінгі қазақтың Құрманғазы атындағы академиялық халық аспаптар оркестрінің көркемдік жетекшісі Тұяқберді Шамелов өткен жылдың күзінде беу, дүние жалғаннан фәниге аттанып кетіп еді. Сол кезде ол шығармашылық сапармен өзінің туған жері Ақжайықта жүрген болатын. Текті, талантты өнер иесінің мәңгілік дамылдайтын орны қай жерде орналасуы керек деген мәселе алдан шыққан кезде, оған Орал-Жаңақала күре жолының бойындағы Мәмен кесенесінің жаны лайықты деп табылды.
Қазақ күй өнерінің кешелі-бүгінгі көрнекті өкілдерінің бірі, Қазақстанның Халық әртісі, бұған дейінгі қазақтың Құрманғазы атындағы академиялық халық аспаптар оркестрінің көркемдік жетекшісі Тұяқберді Шамелов өткен жылдың күзінде беу, дүние жалғаннан фәниге аттанып кетіп еді. Сол кезде ол шығармашылық сапармен өзінің туған жері Ақжайықта жүрген болатын. Текті, талантты өнер иесінің мәңгілік дамылдайтын орны қай жерде орналасуы керек деген мәселе алдан шыққан кезде, оған Орал-Жаңақала күре жолының бойындағы Мәмен кесенесінің жаны лайықты деп табылды.
Кез келген таланттың бас иіп, пір тұтатын адамы болуы табиғи құбылыс. Айталық, жыр алыбы Жамбылдың пірі – Сүйінбай болса, табиғаты тек қарапайымдылықтан жаратылған Тұяқбердінің пірі күй тәңірісі – Мәмен болатын. Тұяқберді Мәменді көрмеген. Өйткені, ол Т.Шамелов дүниеге келместен көп уақыт бұрын өмірден өткен. Әйтсе де, Тұяқберді Мәменнің артында қалдырған күй мұрасы табиғатынан өзіне кереметтей үндестік тапқан. Оның қазақ күй өнерінің қос дүлдүлі Қали мен Мәменге арнаған туындысы да бар.
Айтып-айтпай не керек, күй өнерінің екі буыны мен екі ұрпағы өкілінің кесенесі қатар орналасты. Алыстан көз тартатын осынау қос ақшаңқан кесене жоғарыда айтылғандай Орал-Жаңақала күре жолының бойында орналасқан. Орал өңірінде «Жаңақалаға барып күйшімін деме» деген сөз бар. Әрине, халық айтса қалт айтпайды ғой. Егер Жаңақала-Орда топырағы Құрманғазы мен Динаның, дәулескер күйші Дәулеткерейдің, Мәменнің, Қали Жантілеуовтің, Оқап Қабиғожиннің кір жуып, кіндік кескен кіші отаны болса, осылай демегенде не деуге болады? Қазақ күй өнерінің тағы бір қайталанбас тұлғасы, Қазақстанның Халық әртісі, марқұм Қаршыға Ахмедяровтің сөзімен айтқанда, осындай топырақтан Тұяқбердінің дүниеге келуі, концертмейстер болуы кездейсоқтық емес, заңдылық.
Осыдан екі жыл бұрын Жаңақала ауданының әкімі Лавр Хайретдинов мәдениет үйінің алдынан күйшілер керуенін ашуға бастамашы болды. Соған сай бұл арадан жоғарыда аталған қазақ күйінің пайғамбарларына кеуде мүсіндер орнатылды. Солардың қатарын ала бұлты мен қара бұлты араласып, төбеден төнген қыркүйектің соңғы күні Тұяқберді Шамеловтің кеуде мүсіні толықтырды.
Киелі Жаңақала топырағында көрнекті күйші Тұяқберді Шамеловке арналып тұрғызылған ақшаңқан кесененің ашылу рәсіміне және оны еске алу шараларына қазақтың Құрманғазы атындағы академиялық халық аспаптар оркестрінің ұжымы арнайы келіп, тәу етті, күйші рухына арнап үлкен концерт қойды.
Батыс Қазақстан облысы,
Жаңақала ауданы.