Бизнес • 08 Маусым, 2020

Мемлекет пен кәсіпкер арасындағы дәнекер

35 рет көрсетілді

Әлемді экономикалық тұрақсыздық жайлаған кезеңде кәсіпкерлер үшін сенімді әріптес табу оңай шаруа емес. Себебі бизнесте үлкен тәуекелге баруға тура келеді. Оның салмағын кез келген жеке тұлға немесе компания көтере бермейді. Сондықтан мемлекет-жеке меншік әріптестігін пайдаланған тиімді. Ол мемлекеттік органдар мен жеке меншік сектордың ынтымақтастығына жол ашып, кәсіп иесіне сенім береді.

Елімізде мемлекет-жеке меншік әріптестігіне ерекше көңіл бөлініп, әлеу­меттік маңызы бар салалар­да жүзеге асырылып келеді. Ол эко­но­ми­каны жаңа белеске көте­ру­ге әрі әртараптандыруға негіз бола оты­рып, кәсіпкерлерді ірі ин­вес­­тициялық жобаларға тартуда сеп­ті­гін тигізуде.

Мәселен, мемлекет-жеке мен­шік әріптестік тетігі негі­зін­де са­­лынып, мемлекеттік мен­шік­­ке өте­­тін студенттер жатаха­на­сын ала­­йық. Мемлекет келі­сім­шарт­та бел­гіленген мерзім ішінде жеке әріп­тес­тің инвестициялық шығын­дар­ын қажет болған жағдайда өтеп береді. «Қарапайым заттар экономикасы» бағдарламасына сәйкес, несие сыйа­қысының белгіленген пайызын субсидиялайды. Сонымен қатар жатақ­хананы тұрғындармен қамтуға кепіл­дік береді. Сондай-ақ студенттерден түсетін төлем де бар. Сапалы қызмет көрсететін жекеше әріптес бұл объектіні тиімді басқарады, шығындарды оң­тай­ландырады. Инновациялық тех­нологияларды енгізуге бағыт бе­ре­ді. Нәтижесінде, инвестор ұзақмер­зімді және тиімді бизнеске ие болмақ.

Заңнамада өзгерістер болған жағ­дайда мемлекеттің бастамасы бо­йынша мемлекет-жеке меншік әріптестігі шартын біржақты бұзу­дан сақтандырылған. Тек шарт мер­зі­мі біткен уақытта аталған объек­тіні жергілікті атқарушы орган­ның мен­ші­гіне өткізеді.

Жоғарыда аталған жеке кәсіп­кер­ге беретін артық­шы­лық­та­р­ды ес­кере отырып, қазір осындай әріп­­­тестікке бизнес тарапынан қы­зы­­ғушылық жоғары. Оған «Қа­зақ­стандық мемлекеттік-жеке ­мен­­шік әріптестік орталығы» фронт-офисі вице-президенті Нұрбол Жана­бе­ковт­ің сөзі дәлел бола алады.

– Республика бойынша жалпы құны 1 639 млрд теңгені құрайтын 771 (2020 жылғы 1 мамырдағы мә­лі­­­мет бойынша) жоба жүзеге асы­­­­рылды. Соның ішінде 911 млрд теңгеге – 10 республикалық, 728 млрд теңгеге – 761 жергілікті дең­­­гей­­дегі келісімшарт жасалды. 345 жоба жекеше әріптестердің қар­жы­­лық бастамаларының негізінде қолға алынды. Ал осы жобаларды салалық деңгейде қарастырсақ: 83 жоба – денсаулық сақтау, 177 жоба – білім беру, 49 – спорт және 36 жоба – экономиканың өзге салаларына тиесілі, – дейді Н.Жанабеков.

Мемлекет-жеке меншік әріп­тес­тігі объектілерінің шеңбері ауқым­ды. Десе де, жобалар тізімінің басым бөлігін денсаулық сақтау және білім беру салалары құрайды. Шы­нында, балабақшаларды және мектептердің асханаларын осы тетік арқылы жал­ға беру соңғы жылдардағы трендке ай­налған үрдіс. Нәтижесінде, жер­гі­лікті ат­қа­рушы органдар өзде­рі­нің ал­дын­дағы белгіленген бала­бақ­ша­­ға қатысты мемлекеттік тап­сы­рыс­тарын орындап, халықтың ризашылығына ие болуда. Сонымен қатар денсаулық сақтау саласында медициналық техникаларды сатып алу, денешынықтыру және спорттық кешендерді жеке сектордың бас­қа­руына беру жүргізіліп жатыр.

Иә, қазір өңірлер бойынша сту­дент­­тік жатақханаларға сұраныс жо­ға­­ры. Оқу орындары өз бастамалары бойынша инвесторларды іздес­ті­руге кірісіп те кетіпті.

– Мемлекет-жеке меншік әріп­тес­тігі жергілікті инфра­құ­ры­лым­ның қалыптасуына жол ашады. Сол арқылы кез келген мүлік пен мү­ліктік кешенді салу мүмкіндігі бар. Әрі құрылыс жұмыстарын жүзеге асыру барысында жергілікті ха­лық­ты жұмыс орнымен қамтуға бола­ды. Одан кейін инфраструктура объек­тілерін күтіп ұстау бойынша сер­­вистік қызметтер на­ры­ғының дамуына алып келеді. Әр жыл са­йын қайталана беретін ұйым­дас­ты­ру­шық-ад­минис­тра­тив­тік про­­цес­стерді қысқарту арқылы жер­гі­лік­ті бюджет шығындарын шек­тей­ді, – дейді Н.Жанабеков.

Жеке кәсіпкерлер инвес­тиция­лық шығындардың өтемақысы тү­рін­­дегі ақшалай түсімдерді қарас­ты­­­ратын мемлекеттік-жекеменшік әріп­тестік шарттарын банктерден несие алу мақсатында кепілге беруге заңнама рұқсат береді. Сол себептен банктер жобаларды қар­жы­лан­ды­ру­ға қызығушылық танытады.

2020 жылдың басынан бастап есептегенде республика бойынша 14 мемлекеттік-жеке меншік әріп­тес­тік шарты жасалған. Әрине ал­дың­­ғы жылдармен салыстырғанда бұл төмен көрсеткіш. Бірақ қазіргі күр­­делі кезеңде халықпен тікелей қаты­­насуды қажет етпейтін салалар бо­йынша жобалар қарқынды жүзе­ге асуда.

Еліміздің, әсіресе, үлкен қала­ла­­рында кейбір мектепте оқу орын­дары тапшы немесе үш ауысыммен оқи­тыны мәлім. Сол себептен Үкі­мет мемлекет-жеке меншік әріп­тес­­тігі бойынша мектептер салуға аса көңіл бөліп отырғанын атап өткен жөн.

 

Соңғы жаңалықтар

Жамбыл жылы жырлайды

Руханият • Кеше

Қай салада жалақы өсті?

Экономика • 27 Ақпан, 2021

Ресей азаматтары алғыс айтты

Аймақтар • 26 Ақпан, 2021

Ұқсас жаңалықтар