Сенаторлар Денсаулық туралы кодекс жобасын қарайды

Парламент • 08 Маусым, 2020

Сенаторлар Денсаулық туралы кодекс жобасын қарайды

22 рет көрсетілді

Мәулен Әшімбаевтың төрағалық етуімен Сенат Бюросының отырысы өтіп, онда палатаның 11 маусымға жоспарланған отырысының күн тәртібі бекітілді. Бұл туралы Сенаттың баспасөз қызметі хабарлады.

Орынбек ӨТЕМҰРАТ

Сенаторлар алдағы отырыста Қазақстан Республикасының «Халық денсаулығы және денсаулық сақтау жүйесі туралы» Кодексі жобасын және денсаулық сақтау мәселелері жөніндегі ілеспе заң жобасын қарауды жоспарлап отыр.

Бұған қоса отырыста заңнамалық актілерге атқарушылық іс жүргізуді және қылмыстық заңнаманы жетілдіру, цифрлық технологияларды реттеу, тұтынушылардың құқықтарын қорғау, сондай-ақ халықаралық автомобиль тасымалдарын қадағалап отыру мәселелері бойынша енгізілетін түзетулер қаралады.

Сонымен қатар Бюрода Мәжілістен келіп түскен заң жобалары салалық комитеттерге бөлініп берілді.

Қаржы және бюджет комитеті «Қазақстан Республикасының кейбір заңнамалық актілеріне аудиторлық қызмет мәселелері бойынша өзгерістер мен толықтырулар енгізу туралы» заң жобасы бойынша бас комитет болып белгіленді.

Экономикалық саясат, инновациялық даму және кәсіпкерлік комитеті «Қазақстан Республикасының кейбір заңнамалық актілеріне бизнес-ахуалды жақсарту мәселелері бойынша өзгерістер мен толықтырулар енгізу туралы» заң жобасын одан әрі пысықтаумен айналысады.

Ал «Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заң жобасы Конституциялық заңнама, сот жүйесі және құқық қорғау органдары комитетіне бекітілді.

Бас комитеттерге Сенаттың басқа комитеттерінің ұсыныстарын қорыту және осы құжаттар бойынша қорытындылар дайындау тапсырылды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз