Өртті сөндіру және төтенше жағдай зардаптарын жоюда 9 өрт сөндіруші қызметтік міндетін орындау кезінде көз жұмды. Осы оқиғаның орын алғанына биыл 31 жыл. Қаралы датаға орай, Көкшетау қаласындағы техникалық институтта оқу орнының басшылығы, ардагерлер және жеке құрамның қатысуымен қаза болған өрт сөндірушілерді еске алу кеші болып өтті. Іс-шараға Көкшетау қаласы әкімінің орынбасары Елдар Әбуев қатысып, сөз сөйледі. Ерлігімен есте қалған өрт сөндірушілерді еске алу кеші бір минут үнсіздікпен басталды.
Шараны институт бастығы, азаматтық қорғау полковнигі Сырым Шәріпханов ашып жүргізді. Ол өз сөзінде ерліктің ешқашан ұмытылмайтынын, өз қызметтерінің қауіпке толы екендігін айта келіп, жас мамандар үшін алдыңғы толқынның адал еңбегі, арлы ісі, тәуекелге бел байлауы өшпес өнеге болатынына тоқталды. Бейбіт күннің батырларын еске алып, аруақтарына тағзым ете отырып, ерлерге құрмет көрсету кейінгінің парызы екендігіне тоқтала келе, болашақта өз өмірін осы мамандықпен ұштастырғысы келетін жас мамандар үшін де өз ісіне шексіз ілтипатпен қараудың үлгісі болып қалатынын атап өтті.
Сонымен қатар Ішкі істер министрлігінің құрметті ардагері Сапарғали Асылбеков те сөз сөйлеп, болашақ құтқарушылардың өз ісіне адал болуы, жүктелген міндетті абыроймен атқаруы керектігін атап өтті.
КӨКШЕТАУ
