Әлемдегі ең мықты 10 кәсіпқой боксшы

Спорт • 09 Маусым, 2020

Әлемдегі ең мықты 10 кәсіпқой боксшы

1077 рет көрсетілді

Әлемге танымал BoxRec спорт сайты кәсіпқой бокста әр жылдары өнер көрсеткен ең мықты 10 спортшыны анықтады, - деп жазады Egemen.kz.

Бекен ҚАЙРАТҰЛЫ

Аталған сайттың межелеуіне қарағанда жасы қырықтың қырқасына шыққан американдық боксшы Флойд Мейведер теңдесі жоқ былғары қолғап шебері ретінде танылса, келесі орындарға филиппиндік Мэнни Пакьяо, аргентиналық Карлос Монзон табан тіреген екен. Осылардың әрбіріне тоқталар болсақ:

Флойд Мейведер

Кәсіпқой бокс рингінде 21 жыл тер төгіп, бір ретте жеңіліп көрмей, 50 рет жекпе-жек өткізген. Нәтижесінде «Бір дәуірдің ұлы боксшысы» деген атаққа ие болды. Бұл азамат 2012-2015 жылдары Forbes журналы тізімінде ең бай спортшылардың да көшін бастады.

Мэнни Пакьяо

Бұл боксшы жасы 40-тан асса да бокс рингісінен әлі түспеген тарлан. Спорттық жолында әртүрлі сегіз дивизионның чемпионы атанып, белбеуіне ие болған әлемдігі жалғыз адам. Бірақ 2015 жылы ұйымдастырылған «Ғасыр сайысында» атақты Флойд Мейведерен жеңіліп қалды.

Карлос Монзон

Аргентиналық аңыз боксшы Карлос Монзон 1995 жылы дүниеден өткенге дейін орта салмақта оған тең келер әлемде адам болмады. Чемпиондық белбеуді 7 жыл бойы жан баласына бермеді. Осы атақ үшін 59 дүркін рингке көтеріліп бәрінде жеңіске жетті.

Мұхаммед Әли

Бұл спортшы тек бокс әлемінде ғана емес, өзі өмір сүрген қоғамға өзгеріс әкелген саяси қайраткер. 1967-1970 жылдары Вьетнам соғысына барудан бас тартқаны үшін үлкен спорттан үш жыл шеттетілгені бар. Кәсіпқой боксшы ретінде 1975 жылы Жо Фрейзермен өткізген жекпе-жегі спорт тарихында ең таңдаулы сайыс ретінде тарихта қалды.

Шугар Рэй Робинсон

Кәсіпқой бокстың жеңіл, жартылай жеңіл, орта, жартылай ауыр салмақтарында өнер көрсетіп, барлығы 174 дүркін жекпе-жек өткізіп, оның 19-ында ғана жеңіліс тапқан тарихтағы аса қажырлы былғары қолғап шеберлерінің бірі. Кәсіпқой бокс әлемінде чемпиондық белбеуді бес дүркін жеңіп алған жалғыз боксшы.

Бернард Хопкинс

Бүгінгі таңда 55 жасқа толған кәсіпқой боксшы Бернард Хопкинс өз өмірінде 67 дүркін жекпе-жек өткізіп, оның 55-інде жеңіске жетіп жартылай ауыр салмақта әлем чемпионы атанған азамат. Сонымен қатар 1988-2016 жылдар аралығында үздіксіз 28 жыл тер төгіп, кәсіпқой бокста ұзақ жыл өнер көрсеткен ерекше спортшы.

Жо Луис

1937-1949 жылдар аралығында кәсіпқой бокстың аса ауыр салмақ дәрежесі бойынша 25 дүркін сайыс өткізіп, барлығында жеңіске жеткен аңыз тұлға. Ол АҚШ-та ұлттық батыр деңгейінде ұлықталған алғашқы қара нәсілді спортшы.

Арчи Мур

Бұл жігіт аса ауыр салмақ бойынша әлем чемпионы атағынан айырылмай оны ұзақ жыл ұстаған ерекше талант. Яғни, 1952 жылдың желтоқсан айынан бастап, 1962 жылдың мамырына дейін чемпиондық атағын 10 жыл бойы былқ етпей қорғаған мықты. Боксшы ретінде сайыс стилі қорғану арқылы шабуылға өтетін ерекшелігімен тарихқа таңбаланды. 1998 жылы дүниеден өтті.

Оскар Де Ла Хойа

2009 жылы сәуір айында спорттық карьерасын аяқтаған бұл азамат оған дейін ешкімге дес бермеді. Қазіргі таңда 47 жасқа толған кәсіпқой боксшы әртүрлі 6 дивизонда өнер көрсетіп, 10 дүркін әлем чемпионы титулын иеленген санаулы таланттың бірі. Бес жасынан бастап бокспен шұғылданған спортшы қазіргі таңда танымал бизнесмен.

Хулио Сезар Чавес

Бұл спортшы мексикалық боксшылар сойынан ойып орын алған талант. 1980-2005 жылдары үш дивизонда өнер көрсетіп, барлығының чемпиондық атағына ие болған. Қазір 57 жасқа толып отырған боксшы өзінің чемпиондық титулын 27 дүркін қорғап рекорд орнатқан жалғыз адам. 1994 жылы Фрэнки Рандаллмен кездесіп жеңіліс тапқанға дейін 87 жекпе-жек өткізіп, барлығын жеңіспен аяқтаған екен.