Қоғам • 10 Маусым, 2020

Сәнді бетперде сатамыз

67 рет көрсетілді

Дүкеннен су алуға кірген бетіміз сол еді, бұрыштағы «сәнді бетперде сатамыз» деген жазу көзімізге оттай басылды. Сатушы да соны аңғарса керек, «500 теңге» деп елпілдей жөнелді. Осы бір өтімді затқа тіршілігіміз байланғанын түйсініп тұр-ау шамасы, жөпелдемеде жарнамасын да жасап әлек. Тауарын өткізудің тәсілін тапқан кәсіпкерге таңдай қақпасқа болмады. Ақыры, шөл басуға келгенімізбен қоймай, киер киімімізбен түстес түрлі-түсті маска алып қайттық.

Әңгімеміздің бұлай өрбуіне өзін­дік себеп те жоқ емес. Әдеттегі ме­ди­циналық масканы алып қараңыз. Бағасы 118 теңге. Осыдан 3 ай бұрын пандемияның елесі кезбей тұрған шақта бар болғаны 20-25 теңге кө­ле­мін­де болатын. Дәріханаларда қаптап тұратын елеусіз нәрсе тұмау жұққанда ғана туысымызға айналатын еді. Ал қазір қараша халық бет­пердесіз көше шы­ғуға қорқады, талап та қатал. Заман құбыл­ғанда құны артқан дү­ние­ні демде кәсіпке ай­налдырып алған адам­­дар қаншама.

Дизайнерлік шеберлікке салып, бетпердені қолдан тігетін қыз-ке­лін­­шектердің қатары көбейе түсті. Соның бірі қала тұрғыны Айнұр Ораз­бае­ва. Көпбалалы ана күніне 20-30 сәнді бетперде тігеді. Үлкен қызы да жәр­демдесетін көрінеді.

– Дүкен иесіне 300 теңгеден өткізе­міз. Қолдан бетперде тігу аса қиын шаруа емес. Тігін машинасымен таңнан кешке дейін отырсаңыз 100-150-ге дейін маска тігуге болады. Алайда ою-өрнек салу үшін біраз уақыт кетеді. Сондықтан балалардан қолым қалт боса­ғанда жұмысқа отырамын. Қазір сауда қызып тұр. Карантин уақытында жақсы ермек болды. Әрі балалардың несібесі, – дейді ол. Тігіншінің сөзіне сүйенсек, бетперденің материалы өте сапалы, қанша жусаң да тозбайды. Әрі қолға алып жүрсеңіз де, қалтаға салсаңыз да медициналық маскаға қарағанда әлдеқайда қолайлы.

Медициналық маска демекші, мамандар оны 2 сағат сайын ауыстырып тұруды міндеттеп отыр. Егер арнайы бак­терия жоятын затпен өңделсе, 3-5 сағатқа дейін қолдануға болатын көрі­неді. Дегенмен маска түшкірген, не жөтелгенде су болып қалғанда де­реу жаңасын таққаныңыз жөн. Меди­циналық маскалар бір реттік қол­­дануға ғана арналғандықтан, оны қай­­та өңдеп, жуып, тазалап киемін деп ойл­амай-ақ қойыңыз. Енді, осы тұстан байырқалата тұрып, қайсысы тиім­ді екенін бір бағдарлап көрейікші.

Тәулігіне 8 сағат жұмыс істедім дегеннің өзінде 4-5 маска пайдаланасыз. Ақшаға шаққанда 600 теңгеңіз кетеді. Бір айда орташа есеппен 12-13 мың теңгеңіз ауаға ұшты деген сөз. Ал қолдан тігілген бетпердені жақсылап жусаңыз келесі күні де қаже­тіңізге жарайды. Сондай-ақ ауыз бен мұрынды және иекті толық жауып тұрады. Әрі қарай халыққа қай­сы­сы тиімдірек екенін іштей есептей бе­ріңіз.

Сәнді бетперде науқаны шетелде қызып тұр. Мәселен, Голливуд жұлдызы Гвинет Пэлтроу «Instagram» әлеуметтік желісінде «Airinium» ком­па­ниясының қара маскасымен түскен суретін жариялаған сәттен бастап, көп­шіліктің қызығушылығы арта тү­сіп­ті. Теріге өте жұмсақ тиетін бет­пер­деге жұрттың пікірі алабөтен. Бренд маскалар 66 АҚШ долларына бағаланып, сатылымға шығып та үл­гер­ді.

 Нью-Йорктің ең ескі дәріханасы Бигелоудағы N95 респираторларға ке­зекке тұрған халықтың қарасы көп. Әдетте медицина қызметкерлері тұмау кезінде науқастармен байланыс жасау үшін пайдаланылатын маскаға адам­дар қатты сенетін секілді. Вирус­қа қарсы масканы 30 доллардан сататын британдық «Cambridge Mask» компаниясына тапсырыс әдеттегіден 30 есеге көбейген. Дүниежүзілік денсаулық сақтау ұйымының мамандары масканы науқаспен байланысқа түсетін дәрігерлер мен жұқтырған ауруларға ғана тағуға кеңес беруде. Инфекцияның алдын алудың төте жолы осы дейді.

Нұр-Сұлтан қаласындағы «Гип­пок­рат» дәріханасының дәрі­ха­на­шы­сы Елена Воробьева меди­ци­налық мас­каға сұраныстың өте жо­ға­ры еке­нін айтады.

– Бір адамға 5 маскадан артық бе­ріл­мейді. Себебі басқа тұты­ну­шы­лар­дың да жағдайын ойлағанымыз абзал. Кейде адамдар 100-200 данаға дейін сұрайды. Алайда олай істеу мүм­кін емес, тәртіп бәріне ортақ. Қазір тәу­лі­гіне 500-600 маскаға дейін өтеді, – дейді Е.Воробьева.

 Тағы бір айта кетерлігі, қолда­ныл­ған медициналық маскалар өртеп жібермесе 100 жылға дейін шірімейді екен. Әрі одан келетін зиян да көл-көсір. Елорда көшелерінде ақ теректің ұлпасымен қатар ұшқан маскалар қаптап барады. Бұл да өз алдына бір әңгіме. Десе де, құрметті оқырман, ұзақ уақытқа жарайтын қолдан тігіл­ген сәнді бетперде таққыңыз келе ме, әлде байырғы медициналық маскалар­ды жөн деп санайсыз ба, құқық өзі­ңіз­де...

Әдемі киініп жүруді жақсы көретін жастар жағы заманауи үлгі­дегі бетперделерге әуес. Ал үл­ке­­н­дер болса медициналық мас­ка­дан артығы жоқ деп санайды. Ма­ман­дар екеуінен де келіп-кетер қа­уіптің жоқтығын айтады. Тек ден­саулығыңызды сақтағыңыз келсе, ережеге бағынғаныңыз жөн.

 

Соңғы жаңалықтар

Ресей азаматтары алғыс айтты

Аймақтар • Бүгін, 21:45

Ұқсас жаңалықтар