Қоғам • 11 Маусым, 2020

Кәсіпкерлік негіздерін игеруде

466 рет
көрсетілді
2 мин
оқу үшін

Әйелдер кәсіпкерлігін дамыту – мемлекеттік саясаттың басым бағыттарының бірі екені анық. Осы бағытта орындалып жатқан оңтай­лы жұмыстар да жетерлік. Со­ның бірі – «Кәсіпкер ана» жобасы десек қате­леспеспіз.

Кәсіпкерлік негіздерін игеруде

Нұр-Сұлтан қалалық әкімдігінің мәліметінше, бүгінде жобада онлайн режімде оқуға 1200-ден астам өтінім келіп түскен. Іріктеу нәтижесінде, 500-ге жуық әйел барлық талаптарға сай келіп, қазір 200-ге жуық адам білімдерін жетілдіруде. Үш баланың анасы Айнұр Жазықбаева алты ай бұрын тапсырыспен торттар мен бәліштер пісіре бастаған. Кәсіппен айналысқысы келетін әйелдерге арналған тегін курстар туралы білген ол, мүмкіндікті жіберіп алмауды жөн көрген.

 «Менің ойымша, осындай мүмкіндік берілсе, оны пайдалану керек. «Кәсіпкер ана» жобасы әртүрлі бағыттар бойынша тренингтерден тұрады. Мен өз өнімдерімді әлеуметтік желілерде таныту үшін SMM-ді таңдадым. Бұрын-соңды ешқашан білмейтін көптеген тәсілді үйрендім. Мысалы, өз өнімімді дұрыс жарнамалауды, оны қалай жүзеге асыруды меңгердім», дейді Айнұр Жазықбаева. Енді ол курстарда фотограф мамандығын меңгеріп, әдемі суреттер ұсынуды үйренуді жоспарлап отыр. Оған қоса тренинг онлайн режімінде өткендіктен, үйден шықпай және балаларды қараусыз қалдырмай барлық қажетті дағдыларды алуға мүмкіндік бар.

Еске салайық, «Кәсіпкер ана» әлеуметтік жобасының тұсаукесері өткен жылдың қыркүйе­гінде өтті. Оның міндеті көпбалалы әйелдерге, жал­ғызбасты аналарға, табысы аз әйелдерге, сон­дай-ақ мүгедек балаларды тәрбиелеп отырған ана­ларға жеке ісін бастауға көмектесу.

Айта кететін тағы бір жайт, оқыту 11 негізгі ба­ғыт­­та өтеді. Олар массаж, SММ, копирайтинг, гра­фи­­ка­лық дизайн, суретке түсіру, маникюр, аспаз, кондитер аспаз, есепші, коуч/психолог, тігінші. Әйелдер бағыттардың біреуін таңдап, оқи алады және курсты аяқтағаны туралы сертификат алады.