Елбасы кітапханасы мен Қорғаныс министрлігі ынтымақтастық орнатты

Қоғам • 11 Маусым, 2020

Елбасы кітапханасы мен Қорғаныс министрлігі ынтымақтастық орнатты

18 рет көрсетілді

Тұңғыш Президент – Елбасы кітапханасы мен Қорғаныс министрлігі ынтымақтастық меморандумына қол қойды. Орнатылған қоян-қолтық байланыс Елбасы Н.Ә.Назарбаевтың идеялары мен бастамаларын насихаттауды, жастар саясаты саласында тиімді серіктестік орнатуды, Қазақстанның қалыптасу және даму тарихын зерттеуге бағытталған мәдени-танымдық және ғылыми-зерттеу жобаларын іске асыруды көздейді, - деп хабарлайды Egemen.kz.

Жолдыбай БАЗАР

Рәсім барысында Елбасы кітапханасының директоры, саяси ғылымдардың докторы, профессор Әмірхан Рахымжанов мекеменің орталық және жергілікті мемлекеттік органдармен жан-жақты байланыс орнатып, тәуелсіздік тарихын насихаттау мен патриот жастарды тәрбиелеуді қолға алған ұйымдармен тығыз жұмыс істейтінін белгіледі.

"Біз отандық, халықаралық жобаларды қарқынды дамытуда өскелең ұрпаққа тәрбие мен білім беруге көп көңіл бөлеміз. Ғылыми-білім беру жобаларымыз Тұңғыш Президенттің тұжырымдық идеялары мен жаһандық бастамаларын, "Қазақстан жолының" ерекшелігін, "Мәңгілік ел" ұлттық идеясының мәнін, Елбасының мақалалары мен бағдарламаларын зерттейді. Ашылған сәтінен бастап Елбасы кітапханасы серіктестікті дамыту мақсатында бір қатар меморандумға қол қойып үлгерді. Мұндай келісім көптеген жобалар мен бағдарламаларды ақылдаса дайындауға, бірлесіп жүзеге асыруға жағдай жасайды. Қазақстан Республикасы Қорғаныс министрлігіне қарасты мекемелермен Елбасы кітапханасы көптен бері түрлі іс-шараларды ұйымдастырып келеді. Сондықтан бұл меморандумның біз үшін маңызы зор", – деді ол.

Осы тұста бұрыннан серіктес Елбасы кітапханасы мен Тұңғыш Президент – Елбасы атындағы Ұлттық қорғаныс университетінің бір қатар шара ұйымдастырғанын айта кеткен жөн. Қоғамдық маңызы бар олардың қатарына "Стратегия–2050" негізінде Қазақстан Республикасы қауіпсіздігін қамтамасыз етудің өзекті мәселелері: тәжірибе және жоспар" дөңгелек үстелі, "Ел тағдырын айқындаған Тәуелсіздік" форумы, "Жастар ортасында діни экстремизмнің таралуы: жағдайы және даму үдерісі" дәрісі, көшпелі экскурсиялар, т.б. кіреді. Ал 2016-2019 жыл аралығында өткен Елбасы кітапханасының семинар-тренингтеріне Ұлттық қорғаныс университетінен 200 адам қатысып үлгерген.

Құжатқа қол қойған Қазақстан Республикасының қорғаныс министрі, генерал-лейтенант Нұрлан Ермекбаев еліміздің ұлттық қауіпсіздігін қамтамасыз етуге Н.Ә. Назарбаевтың зор еңбек сіңіргенін айтып өтті.

"Ұлы даланың жеті қыры", "Болашаққа бағдар: рухани жаңғыру" мақалаларына негіз болған Тұңғыш Президенттің бастамалары мемлекеттің даму векторын анықтап қана қоймай, қоғамдық сананы да, азаматтардың тарихи жадын да жаңғыртады, Қарулы күштердің тәрбие жұмысын бағыттайды. Отан қорғаушылар ар-намыс пен ерліктің, патриоттық пен халыққа қызмет етудің үлгісі болып келеді. Елбасы кітапханасының көрмелері, семинар-конференциялары қатысушылардың көшбасшылық қасиетін арттырып, іс пен елге адал болудың құштарлығын оятады", - деді ол. Сөз соңында ол Елбасы кітапханасының қызметін жоғары бағалап, ортақ жұмыстың сүбелі жетістікке толы боларына сенімділік танытты.

Күннің маңызды және өзекті жаңалықтарын «Егемен Қазақстан» телеграм каналынан оқыңыз