Ел дамуының берік негізі

Іс-шараға ҚХА Төрағасының орын­басары Ж.Түймебаев, Мәжі­ліс Төрағасының орынбаса­ры В.Божко, Ақпарат және қоғам­дық даму вице-министрі М.Әзілханов, Қолданбалы этносая­си зерттеулер институтының дирек­то­ры Т.Қалиев, Президент жа­нын­дағы ҚСЗИ директоры З.Шәу­ке­нова, ҚХА Ғылыми-сарап­шы­­лық кеңесінің төрайымы А.Сәдуақасова, қазақстандық сарап­шылар мен ғалымдар, ҚХА Ғылы­ми-сарапшылық кеңесінің және ҚХА мүшелері, мемлекеттік органдар мен этномәдени бір­лес­тік­тердің өкілдері қатысты.

Отырыс барысында қаты­су­шылар: «Қоғамдық келісім және жалпыұлттық бірліктің қазақ­стандық моделі: Қазақстан халқы Ассамблеясына 25 жыл», «Этно­с­аралақ саладағы мемлекеттік сая­сат модернизациясының ба­сым­­дықтары аясындағы ҚХА Ғылы­ми-сарапшылық кеңесінің мін­деттері», «Қолданбалы этносаяси зерттеулер институтының перс­пективті міндеттері» және т.б. тақы­рыптарды талқыға салды.

«Мерейтойлық датаны атап өте отырып, біз қазақстандық үлгінің жетістігінің негізгі факторы Елбасы Нұрсұлтан Назарбаевтың саяси көшбасшылығы мен ерік-жігеріне байланысты болғанын еш­қашан ұмытпауымыз керек. Біз Қазақстанның Тұңғыш Президентіне ел басшылығында бол­ған 30 жыл ішінде кез келген өзгерістерге, геосаяси жағдайларға қарамастан, этносаралық мәселеде өз ұстанымдарынан айнымаған саяси ерік-жігеріне зор құрмет көрсетуге тиіспіз. Қазір біз Қа­зақ­ст­анның Тұңғыш Президенті – Елбасы Нұрсұлтан Назарбаевтың бейбітшілік пен келісім сая­са­тын қорытындылаудың ма­ңыз­ды шегіндеміз. Аталған мәселе бо­йынша жұмыстың жаңа мүм­кін­шіліктері ашылуда. Ғылыми қо­ғам­дастық алдында өте маңызды міндет тұр – Елбасының Қазақстан халқын саяси ұлтқа интеграциялау бойынша құнды тәжірибесін талдап қорыту.

Осы орайда этносаралық қаты­нас­тар саласындағы мемле­кет­тік сая­саттың жаңа парадигмалары мен алгоритмдерін қалыптастыру қажет», деді Жансейіт Түймебаев.

Татулық пен келісім құнды­лық­тары Елбасы Нұрсұлтан Назар­баев саясатының әрдайым аса маңызды басымдықтары екені белгілі. Соның арқасында қоға­мы­мыздың көпэтносты болуы, мәдениеттер мен тілдердің алуан түрлілігі біздің артықшылығымыз бен жетістігімізге, Қазақстан да­муы­ның берік негізіне айналды.

Ж.Түймебаев этносаралық келісімді, қоғамдағы толе­рант­ты­лықты және халық бірлігін ны­ғайтуға септігін тигізуші біре­гей институт – Ассамблеяның қызметі мен ерекшелігіне тоқта­ла кетті: «Бүгінде біз Нұрсұлтан Назарбаев әлемдегі ең сәтті ұлт­аралық қатынастар моде­лі­нің авторы болғандығын нық сенім­мен айта аламыз. Нұрсұлтан Әбішұлы Назарбаевтың басшы­лы­ғымен еліміз әлемдегі бедел­ді әрі орнықты мемлекетке айналды. Елбасының саяси көшбас­шы­лы­ғын, президенттік институтты қоғамдық келісім мен бірлік саясатынан бөліп қарауға болмайды.

Тәуелсіздік жылдарында елдегі барлық стратегиялық құжаттар этносаралық қатынастар факторын ескере отырып қабылданды. Мем­лекетіміздің дамуы, әлеу­мет­тік-экономикалық және саяси реформалар қоғамдағы келісім мен бірлікті нығайту шартымен жүзеге асырылды. Бұл Қазақстан дамуының аксиомасына айналды. Ассамблея өзінің 25 жылдық белсенді жұмысында орасан бірік­ті­рушілік пен зияткерлік әлеует жинақтап және халықтық дип­ломатия институты үлгісіне бейім­деле отырып, ұзақ даму жолынан өтті».

Сондай-ақ кеңейтілген отырыс барысында ҚХА Ғылыми-сарап­шылық кеңесінің алға қойған мін­деттері жайында баяндамалар жасалып, жаңадан құрылған Қолданбалы этносаяси зерттеулер институтының қызметі таныс­ты­рылды. Басқа аймақтардың қа­тысушылары ZOOM конференц-платформасы арқылы онлайн режімде қосылды.