Футбол • 12 Маусым, 2020

АПЛ автокинотеатрда көрсетіледі

153 рет
көрсетілді
3 мин
оқу үшін

Коронавирус пандемиясына байланысты уақытша тоқтатылған футболдан ұлт­тық біріншіліктер қайта өткізіле бастады. Мәселен, Германия бундеслигасы 16 мамырда, Испания Ла Лигасы 11 маусымда қайта жалғасты. Енді, міне, 17 маусымда ағылшын Премьер-лигасының матчтары да жанкүйерлермен қайта қауышады.

АПЛ автокинотеатрда көрсетіледі

BBC басылымының хабарлауынша, жанкүйерлер стадионға кіре алмайтын бол­ған соң ағыл­шын футбол көрер­мен­деріне 4TheFans ком­­паниясы Drive-In Football ұйым­дастырып, матч­тар­ды Лондон, Манчестер, Ли­­вер­пуль және басқа да­­­ қа­ла­ларда автомобиль ки­но­театрында көр­сетуді жоспарлауда. Қазірше Еуро­пада жан­күйерлерге бір жерде топтасып жиналуға бол­май­ды. Десе де әркім ойынды өз көлігінде отырып, тамашалай алады.

Пандемияға байланысты карантин уақытында Еуропада көңіл көтеретін орындар уақыт­ша жабылған соң, автокинотеатрлар жаңбырдан кейінгі саңырауқұлақтай қаптап кетті. Көліктен түспей фильм та­ма­шалау мүмкіндігін беретін мұн­дай автокинотеатр өткен ға­сыр­дың 50-60-жылдары АҚШ-та өте танымал болған еді.

Автокинотеатрда эпиде­мия­лық қауіпсіздік ереже­лерін сақ­тауға толық мүмкіндік бар. Мы­салы, көліктер бір-бі­рі­нен 2 метр қашықтықта орна­ласады, сеанс уақытында сыртқа шығуға болмайды, кей жерлерде көлікте адам саны екі-үшеуден аспауы керек, сусын мен попкорнға тапсырыс беруге болады және оны маска тағып, қолғап киген курьер жеткізіп береді. Заманауи автокинотеатрда көліктегі радио­қабылдағыш арқылы аудиотрансляция жасалады.

Deutsche Welle мәліметінше, пандемияға дейін Германияда 20 автокинотеатр болса, нау­рыз-сәуір айларында тағы 30-ы ашыл­ған. Францияның Бордо қа­ласында Drive-In Festival ат­ты автокинотеатр ашылып, 24 мамырдан бері елдің бірнеше қаласында турне ұйымдастырды. Кинофестиваль өткізумен танымал болған Канн қаласындағы Palm Beach мейрамханасының ав­тотұрағында уақытша автокинотеатр орналастырылған. Маусым айының басынан бастап мұндай кинотеатр Францияның басқа қалаларында да ашылды.

Айта кетейік, 17 маусым­да 28-турдың кейінге шегеріл­ген кездесулері өтеді. Бұл бәсе­­келерде «Манчестер Си­ти»­ мен «Арсенал» және «Астон Вилла» мен «Шеффилд Юнайтед» клубтары ойнайды. Ал 19 маусымда 30-тур матч­тары ұйымдастырылады. Англия чемпионаты уақытша тоқтатылғанға дейінгі жағдай бойынша, қоржынында 82 ұпайы бар «Ливерпуль» жеке-дара көш бастап тұр. Екінші орындағы «Манчестер Сити» «Ливерпульден» 25 ұпай қа­лып келеді. Қалалықтар бас­ты қарсыласынан бір ойын кем өткізген. Үшінші орында – «Лестер» клубы орналасқан. Қор­жынында 53 ұпай бар. Сондай-ақ «Челси» (48 ұпай) мен «Манчестер Юнайтед» (45 ұпай) үздік бестіктің санатында. Ал көш соңындағы «Норвичтің» небәрі 21 ұпайы бар.

Турнир кестесіне қарасаңыз, биыл «Ливерпульдің» бәй­гені шаппай алып, чемпион атанатынына еш күмән келтірмейсіз.