Өткен сенбіде Астанада Қазақстан Кәсіподақтары федерациясының ұйымдастыруымен, Мәдениет және ақпарат министрлігі, Еңбек және халықты әлеуметтік қорғау министрлігі, Астана қаласы әкімдігінің қолдауымен кәсіподақтар күні кеңінен аталып өтті.
Өткен сенбіде Астанада Қазақстан Кәсіподақтары федерациясының ұйымдастыруымен, Мәдениет және ақпарат министрлігі, Еңбек және халықты әлеуметтік қорғау министрлігі, Астана қаласы әкімдігінің қолдауымен кәсіподақтар күні кеңінен аталып өтті.
Кәсіподақтар федерациясы ғимаратының алдында қала тұрғындары мен меймандары үшін азық-түлік жәрмеңкесі жұмыс істеп, арты үлкен мерекелік шараға ұласты. Өнерпаздар концерт қойып, спорттық жарыстар ұйымдастырылды. Сонымен қатар, халыққа таратылған ұтыс лотереялары ойналып, жеңімпаздар тоңазытқыш пен теледидарға, басқа да көптеген бағалы сыйлықтарға ие болды.
Осы шара аясында Қазақстан Кәсіподақтары федерациясының төрағасы Әділғазы Құсайынов шараға облыстардан шақырылған делегаттармен дөңгелек үстел басында кездесіп, кәсіподақтардың қазіргі жағдайы мен болашақ даму барысы туралы үлкен әңгіме қозғалды. «Кәсіподақтар туралы» заң жобасының әзірленіп, Парламент талқылауына ұсынылғандығы, бұл заң қабылданған кезде кәсіподақтардың дамуына үлкен қозғау салатындығы айтылды.
Осы шараға өңірлерден келген делегаттар өз ойларын ортаға салды. Олар мұндай шараның көп жылдардан бері бірінші рет кең көлемде ұйымдастырылып отырғандығын айтып, осы іске мұрындық болған Қазақстан Кәсіподақтары федерациясына үлкен алғыстарын білдірді.
Мен «Қазақстан темір жолы» АҚ-тың батыс филиалында электр механигі болып қызмет етемін. Біздің ұжымда 1200 адам бар. Атырауда, Ақтауда бөлімшелеріміз жұмыс істейді. Бізде кәсіподақ жұмысы жақсы жолға қойылып келеді. Жұмыс берушімен арада ұжымдық шарт жасалған. Осыған сәйкес ұжым жұмысшыларына бірқатар әлеуметтік көмектер ұсынылып отыр. Жұмысшылардың және олардың балаларының демалысына қолайлы жағдайлар туғызылған. Еңбек қауіпсіздігінің мәселесі ұжымдық шартта ескерілген. Осының барлығы елімізде кәсіподақ қозғалысының өріс ала түскендігін білдіреді, – деді мерекелік шараны атап өту үшін еліміздің батыс өңірінен келген Қайрат Әлиұлы. Ол өзінің кәсіподақ тарапынан өткізіліп отырған мұндай шараға бірінші рет қатысып отырғандығын айтып, осыған байланысты Қазақстан Кәсіподақтары федерациясының басшылығына алғысын білдірді.
Сұңғат ӘЛІПБАЙ,
«Егемен Қазақстан».