Дипломат Президент

Саясат • 15 Маусым, 2020

Дипломат Президент

146 рет көрсетілді

Қасым-Жомарт Кемелұлы Тоқаев саясат ғылымдарының докторы атағын алған халықаралық қатынастар саласының халықаралық деңгейдегі шебері. Алғашқы дипломатиялық жолын Совет Одағы кезінде екінші хатшы дәрежесінен бастап, бірінші хатшы, кеңесші дәрежелеріне дейін көтеріледі. Ол бірнеше елдерде, атап айтқанда Қытай және Сингапур елдерінде қызмет атқарып, БҰҰ-ның отырыстары мен халықаралық және аймақтық жиындарға қатысу арқылы дипломатиялық біліктілігі шыңдалады.

Egemen Qazaqstan

1991 жылы Қазақстан тәуелсіздігін алғаннан кейін, Сыртқы істер министрінің орынбасары, қазақ дипломатиясының көшбасшысына айналып, Сыртқы істер министрі болып тағайындалады. Сондай-ақ Қасым-Жомарт Кемелұлы Қазақстан Республикасының Премьер-министрінің орынбасары, Премьер-министрі, кейін ҚР Парламенті Сенаты төрағасының қызметін атқарады.

Өз елінде және шетелдерде өткен көптеген халықаралық және аймақтық конференциялар мен кездесулерге қатысып, келіссөздер жүргізу мен пікір алмасудың қыр-сырын меңгереді.

Қасым-Жомарт Кемелұлының атқарған кейбір жетістіктеріне тоқталып кететін болсақ:

- 1996 жылы Ядролық сынақтарға жаппай тыйым салу шартына қол қойған;

- БҰҰ Бас хатшысының орынбасары және БҰҰ-ның Женевадағы кеңсесінің Бас директоры лауазымдарында еңбек етті;

- "Күшті Президент – ықпалды Парламент – есеп беретін Үкімет" деген атақты сөздің авторы.

Ол – өте байсалды, аз сөзді, жақсы оратор. Ол ҚР Тұңғыш Президенті – Елбасы Нұрсұлтан Әбішұлы Назарбаевтың өте жақын серігі болып, Елбасының өмірлік тәжірибесінен, көшбасшылық және қиындықтардың шешімін таба білу сияқты қасиеттерінен өзіне көп пайда алды.

2019 жылдың 20-шы наурызында "Нұр-Отан" партиясы, Парламент Сенаты пен Мәжілісінің бір ауыздан қолдауымен ҚР Президенті лауазымына кандидатурасы ұсынылды.

Кейін президенттік сайлауда жеңіске жетіп, 2019 жылдың маусым айында жер көлемі жағынан Ислам әлеміндегі ең үлкен мемлекет, Ресей мен Қытай секілді екі алпауыт елдің ортасында орналасқан Қазақстан Республикасының Президенті атанды. Сондай-ақ Қазақстан араб елдерімен тамыры тереңде жатқан Ислам діні арқылы да тығыз байланысады. Әсіресе, Қазақстан мен Араб түбегіндегі елдер арасында өте ерекше әрі жоғары деңгейдегі қарым-қатынастар орнатылған.

• Несие қарыздарын кешіру: 2019 жылдың 26 маусымында Қасым-Жомарт Тоқаев 500 мыңға жуық қазақстандықтың шамамен 300 мың теңге көлеміндегі банк алдындағы берешегін кешу туралы жарлыққа қол қойды.

• Мұғалімдердің жалақысын көтеру: 2019 жылдың 16 тамызында өткен Тамыз конференциясында Президент мұғалімдердің жалақысын екі есеге арттыруды тапсырды.

• Шәкіртақыны өсіру: 2019 жылы 10 желтоқсанда қазақстандық студенттердің шәкіртақысын өсіруді тапсырған болатын.

• Шағын және орта бизнесті қолдау: 2019 жылдың 2 қыркүйегінде Үкіметке шағын және орта бизнес саласындағы компанияларды 2020 жылдың басынан бастап табысқа салынатын салықтан 3 жылға босату туралы тапсырма берді.

Қасым-Жомарт Кемелұлы Тоқаев сөйлеген кезде оны бәрі мұқият тыңдайды. Оның айқын айғағы ретінде коронавирус пандемиясына қатысты апта сайын, ай сайын сөйлеген жолдауларын қазақ халқы асыға күтіп отыратын. Ол көрегенділігі мен жігерінің арқасында Қазақстанды осы пандемия мен салдарынан аман алып шықты. Ол әрқашан жастарға қолдау білдіріп, іскерлікке, көшбасшылыққа үндеп жүреді. Міне, қазір биліктің тізгінін алғаннан бері бір жыл өтіп отыр. Осыған орай, Жоғары мәртебелі ҚР Президенті Қасым-Жомарт Кемелұлы Тоқаев мырзаны шын жүректен құттықтаймын. Оған сәттілік пен жетістік, зор денсаулық, Қазақ еліне бейбітшілік, тұрақтылық пен өркендей беруін, бауырлас қазақ халқының гүлдене беруін тілеймін.

Осы орайда, барша қазақстандықтарды, үкіметі мен халқын шын жүректен құттықтай отырып, жақсылық, денсаулық пен бейбітшілік тілегім келеді!

Д-р Дахир Аленази

Зейнеттегі Елші