Үстіміздегі жылғы, қазанның 5-інен 6-ына қараған түні Мәскеуде ресейлік Александр Поветкин мен украиналық Владимир Кличконың арасында аса ауыр салмақта әлем чемпиондығын сарапқа салған жекпе-жек болып өтті. Мамандар қазір «ғасыр жекпе-жегі» деп атап жүрген бұл шайқастың барлық 12 раундында В.Кличко қарсыласынан бір сүйем болса да артық түсіп отырды. Бұған қоса, ол өз визавиін осы уақыт аралығында 4 мәрте нокдаунға түсірді.
Үстіміздегі жылғы, қазанның 5-інен 6-ына қараған түні Мәскеуде ресейлік Александр Поветкин мен украиналық Владимир Кличконың арасында аса ауыр салмақта әлем чемпиондығын сарапқа салған жекпе-жек болып өтті. Мамандар қазір «ғасыр жекпе-жегі» деп атап жүрген бұл шайқастың барлық 12 раундында В.Кличко қарсыласынан бір сүйем болса да артық түсіп отырды. Бұған қоса, ол өз визавиін осы уақыт аралығында 4 мәрте нокдаунға түсірді.
Бұл күні 37 жастағы Владимир Кличко WBA нұсқасы бойынша «суперчемпион», сондай-ақ WBO және IBF бойынша чемпион атақтарын қорғауға тиісті болды. Тағы бір дерек, Владимир Кличко кәсіпқойлар арасында 63 ұрыс өткізіп, соның 60-ында жеңіске жеткен. Бұлардың 51-ін нокаутпен бітірген. 3 рет ұтылған. Бірақ соңғы 9 жылда жеңіліп көрмеген.
Бірінші минуттардан А.Поветкиннің қорғаныста қалмайтыны белгілі болды. Ол бірден алға ұмтылды. Ал В.Кличко мұндай тактикаға дайын болып шықты. Украин боксшысы өзінің сүйікті тактикасы – клинчті жиі қолданды. Бойы да, қолы да қысқа Поветкин алға келе бергенде, өзіне тым жақын жіберіп алып, бірден қаумалап құшақтай қояды. Ал алыста жүргенінде жеке-дара соққыларымен қайта-қайта қарсыласының кекілін желп-желп еткізеді. Мұндай ұрыста кімнің джебті жақсы қолданатыны анық көрінеді. Бұл жағынан Владимир тағы да басым түсіп жатты.
Шайқастың ортасына қарай Александрдің шаршағаннан құлап қала жаздап жүргені аңғарылды. Тек соңғы раундта ғана ресейлік боксшы қарсыласының жүйкесіне тиетін бірер соққы жасай алды. Алайда, бұл кезде кімнің жеңгені белгілі еді. Соңында төрешілердің үшеуі де 120:104 деген есеппен жеңісті украин боксшысына берді. Бұған қосатынымыз, жеңімпаздың бұл шайқаста алған ақшасы 17 млн. долларға жақындады.
Осы күні «Олимпийский» рингінде тағы бірнеше қосымша жекпе-жектер болып өтті. Алдымен ресейлік Григорий Дрозд Еуропа чемпионы поляк Матеуш Мастернакты еркін ұтты. Келесі шайқаста ресейлік Рахим Чахкиев румын Юлиан Илиені нокаутқа түсірді. Ал әлемнің экс-чемпионы өзбекстандық Руслан Чагаев РАВА белбеуі үшін таласта серб Йова Пударды ұпай санымен жеңді.
Руслан ИГІЛІК.
