– Қолданыстағы заңнамаға сәйкес, мемлекеттік қызметшілердің моральдық-әдептілік бейнесіне қойылатын жалпы қабылданған талаптар мен олардың мінез-құлқының негізгі стандарттары белгіленген. Бұл ретте Әдеп кеңесі мемлекеттік қызметшілердің қызметтік әдепті сақтаудағы жауапкершілік деңгейін арттыруды, әдеп жөніндегі уәкілдердің қызметін үйлестіруді қамтамасыз етеді. Әдеп кеңесі отырыстарында тәртіптік істерден бөлек, мемлекеттік органдардың мемлекеттік қызмет және сыбайлас жемқорлыққа қарсы іс-қимыл туралы заңнаманы бұзушылықтарының алдын алу жұмысының қорытындылары, әдеп жөніндегі уәкілдер қызметі, мемлекеттік органдардың тәртіптік комиссияларының жұмыс нәтижелері қаралуда, – дейді Мемлекеттік қызмет істері агенттігі Түркістан облысы бойынша департаментінің басшысы, Әдеп жөніндегі кеңес төрағасы Айбек Шілманов.
Осы қағидаға сәйкес, кеңес алаңы мемлекеттік қызметшінің тәртіптік ісін қарап қана қоймай, сонымен қатар олардың құқықтарын қорғау бойынша тиісті шаралар қабылдайды. Мәселен, 2020 жылы кеңесте қаралған 29 тәртіптік істің жартысына жуығы (дәлірегі 48 пайызы) дәлелін таппауына байланысты қысқартылған. «Яғни бірқатар мемлекеттік органдардан лауазымды тұлғаларға қатысты түскен ұсынуларды мұқият зерделеп, тергеп-тексеріп, тиісті уәкілетті органдардың қорытындысы нәтижесінде негізгі мемлекеттік қызметшілердің кінәсі анықталмағандықтан, Әдеп жөніндегі кеңес мүшелерінің шешімімен тәртіптік істер тоқтатылып, мемлекеттік қызметшілердің құқықтары қорғалуда. Бұл өз кезегінде, қарапайым халықпен қатар, мемлекеттік қызметшілердің де Әдеп жөніндегі кеңеске деген сенімділігін арттырып, одан әрі сапалы жұмыс істеуіне өз септігін тигізеді», дейді департамент басшысы.
Биыл Түркістан облыстық Әдеп кеңесінде мекемеде карта ойнаған, карантиннің кезінде достарымен балық аулауға барып, туған күн тойлаған, саунаға түскен бірқатар лауазымды тұлғалардың тәртіптік істері қаралды. Жасыратыны жоқ, қоғамда бұл туралы түрлі пікір айтылды. Алайда Айбек Ақбергенұлы талап бәріне ортақ дейді. «Мемлекеттік қызметші халықтың, елдің алдындағы тұлға болғандықтан, әр айтқан сөзі мен іс-қимылын халық жіті бақылап отырады, көңіл таразысынан өткізеді. Сондай-ақ қарапайым жұртшылықпен салыстырғанда мемлекеттік қызметшілерге заңнамамен тиісті шектеулер бекітілген. Атап айтқанда, мемлекеттік қызмет туралы заңнама аясында мемлекеттік қызметке қабылдану кезінде азаматтар өздерінің лауазымдық өкілеттіктерін және соған негізделген беделін жеке басының, топтық және өзге де қызметтік емес мүдделерде пайдалануға алып келуі мүмкін әрекеттерді болғызбау мақсатында өзіне заңда белгіленген шектеулерді қабылдайды. Сонымен қатар мемлекеттік қызметші тиісті ант қабылдап, Әдеп кодексінің мәтінімен жазбаша нысанда таныстырылады. Сондықтан мемлекеттік қызметшілер заңнама талаптарына сәйкес, өздерінің қызметтік міндеттерін орындауы қажет, сәйкесінше орындамаған жағдайда тиісті жауаптылықта болатыны белгіленген. Мәселен, биыл пандемияға байланысты, еліміздегі төтенше жағдай кезінде өңірдегі бірқатар лауазымды тұлғалар тарапынан карантиндік режімді сақтамай, атаулы іс-шараларға қатысқаны туралы фото және бейнежазбалар әлеуметтік желілерге кеңінен таралған болатын. Осының салдарынан өздерінің іс-әрекеттерімен қоғам тарапынан айтылатын сынға себепкер болғаны анықталып, Әдеп жөніндегі кеңесте олардың тиісті жауапкершілігі қаралды. Бұл ретте кеңестің негізгі мақсаты – мемлекеттік қызметшінің қызметтік әдепті сақтаудағы жауапкершілік деңгейін арттыру, сәйкесінше тәртіптік жауапкершілікке тартудағы негізгі философиясы да болашақта осы теріс қылықты қайталап жасамау», дейді Әдеп кеңесінің төрағасы.
Түркістан облысы