Қазақстанда 200-ден астам жалған кәсіпорындар қылмыскерлер мен нашақорлардың аттарына тіркеліп келген екен. Оны республика Қаржы полициясы ақпараттық-талдау департаментінің басшысы Олжас Бектенов мәлімдеді.
Қазақстанда 200-ден астам жалған кәсіпорындар қылмыскерлер мен нашақорлардың аттарына тіркеліп келген екен. Оны республика Қаржы полициясы ақпараттық-талдау департаментінің басшысы Олжас Бектенов мәлімдеді.
«Матрешки» қағидатымен тереңдете тексеру жұмыстары бұрын сотты болған, нашақорлықпен айналысып жүрген, маскүнемдікке салынып кеткен, өлу халінде жатқан кісілердің аттарына тіркелген 200-ден астам жалған кәсіпорындардың бар екенін анықтап берді. Сондай-ақ, бұл топтарды ұйымдастырып, басқарып жүрген адамдар да табылды», деді ол.
Тұтастай алғанда, О.Бектеновтің сөзіне қарағанда, ситуациялық орталық жұмысының арқасында жалған кәсіпкерлікпен айналысушы қылмыстық топтарды анықтау деңгейі айтарлықтай артқан.
«Егер бүкіл 2012 жыл бойына республика бойынша жалған кәсіпкерлік дерегімен 82 қылмыстық іс қозғалған болса, биылғы жылдың 9 айы ішінде ғана анықталған мұндай қылмыстар саны 771-ге жетті. Былайша айтқанда, өткен жылға қарағанда, көрсеткіш 3 есеге жуық көтеріліп отыр», деп атап өтті департамент жетекшісі.
«Бұдан бөлек, ситуациялық орталықтың базасында жалған кәсіпорындардың, олардың контрагенттері мен тұлғаларының базасы жасалды. Бұл салықтан заңсыз жалтару мен қаржыны қолма-қол ақшаға айналдырып алушыларды тез анықтауға мүмкіндік береді», дегенді қосты қаржы полициясының өкілі.
Айта кету керек, Қаржы полициясы агенттігі бұдан бірқатар уақыт бұрын ситуациялық жағдай орталығының тұсауын кескен болатын. Ол болуы ықтимал көлеңкелі және жемқорлық схемаларын дер кезінде анықтап отыруға мүмкіндік беретін автоматтандырылған талдамалы кешен болып табылады.
Құрыш НҰРЫМБЕТ.