Екі айлық үзілістен кейін Еуро­падағы доп додасын Германия бунде­слигасы бастап бергені бар­шаға мәлім. Және ең бірінші болып маусымды аяқтайтын да осы  немістер. Германияда чемпионаттың аяқталуына бір тур ғана қалды. Соң­ғы тур ойындары 27 маусымға жоспарланған. Ал чемпион атан­ған команда осыдан екі тур бұ­рын анықталып қойды. Биылғы чемпион­дықты қоса есептегенде «Бавария» командасы қатарынан сегізінші жыл үздік атанып, бас жүлдені ешкімге бермей келе жатыр. Чемпионатты ең кейінгі болып Ағылшын Премьер-лигасы жалғастырды.

Жалпы осы төрт чемпионатты бақылай келе, футболдың бұрын­ғыдай емес екеніне көз жеткіздік. Коронавирус тек футболшыларға ғана емес, футболға да өз әсерін тигіз­бей қоймапты. Сонымен пандемиядан кейін футбол қалай өзгерді, анығырақ айтқанда вирус футболды қалай өзгертті?

«Көрерменсіз сахна – тұл» дегендей, жанкүйерсіз стадион да – тұл екен. Қанша жерден сүйік­ті командаң жасыл алаңда ба­рын салып ойнап жатса да, гол со­ғыл­ғанда қуанып, қақпаға доп өткізіп алғанда футболшымен бірге мұңаятын жанкүйер болмаса, футболда еш қызық жоқ екен. Бұл жағдай футболшыларға да қатты әсер еткен сыңайлы. Сон­дықтан Ис­пания және Англия фут­болының ұйымдастырушылары ста­дионға жа­санды дауыс орнатып жатыр. Яғни гол соғылғанда, қақпа алдын­да қауіпті сәт туғанда стадионда жанкүйерлердің эмоциясын білді­ретін жасанды дауыс қойылады. Бір қызығы, бұрындары видео ойындар құрастыратын америкалық EA Sports компаниясы футбол матчтарынан дауыс жазып алатын болса, қазір сол дауыстарды енді стадионның өзінде қолданып жатыр.

Футболшылардың физикалық дайындығы – маусымның басында­ғыдай. Тіпті одан да нашар деп айтуға болады. Өйткені бұл жолғы үзі­ліс жаз кезіндегі үзілістен көпке созы­лып кетті. Сондай-ақ футболшы­лар маусым аралық кезеңдегідей жаттығу жасап, жолдастық матч өткі­зе алмады. Ойынның соңында фут­бол­шылардың шаршап қалғаны да осы физикалық дайындықтың төмен­дігінен.

Десе де футболшылар алаңда барын салып, бәрі мүмкіндігінше ойнап жатыр. Мұны олардың футболды сағын­ғанымен байланыстыруға болады. Сондықтан ойыншылардың тамы­ры тартылып, жарақат алып қал­ған жағдайлар жиілеп кетті. Әдетте жоғары қарқында өткен ойындарда осын­дай жағдай көп кездесетін еді.

Сондай-ақ үш айлық үзіліс футболшылардан бөлек, қақпашыларға да кері әсерін тигізді. Карантин уақы­тында олардың дайындық жұмыс­тарын жүргізуі өте қиынға соқты. Оның үстіне жолдастық кездесулердің өтпеуі де қақпашыларға қиындық туғызғаны анық.

Ойындар кестесі өте тығыз жа­сал­ғаны бапкерлерге футболшы­ларды түрлі позицияларда сынап көруге мүмкіндік бермей жатыр. Жаттықтырушылардың бас­ты мақсаты – қалған ойындарды жара­қатсыз және тәуекелге бармай ойнап шығу болып тұр. Сонымен қа­тар футболшылардың техникалық мүмкіндіктері де орташадан төмен екені көрер көзге анық байқалады.

Ал УЕФА-ның командаларға ойын барысында футболшыларды бұрынғыдай үшеу емес, бесеу­ге дейін ауыстыруға рұқсат бер­гені жаттықтырушылардың оң жамбасына келді. Себебі бірқатар ойында матч барысында футболшы­лар жиі жарақат алып жатқанын айт­­тық. Екінші жағынан кездесу тағ­дырын өзге арнаға бұрып жібере ала­тын креативті ойыншыларды алаң­­ға шығаруға мүмкіндік туып жа­тыр. Және бұл кей жағдайда оң әсе­­рін беріп, командаларды жеңіске жете­леуде.

Күнтізбенің тығыз жасалуын кей командалар тиімді пайдаланып жат­қанын да айта кету керек. Мәселен, АПЛ-дың рестарттағы ең алғашқы матчының бірі болған «Манчестер Сити» мен «Арсенал» арасындағы ойын­да «зеңбірекшілердің» бас бапкері Микель Артета «қалалықтарға» төтеп беру мүмкін емес екенін түсініп, алаңға негізгі емес, жастардан құ­рал­­ған аралас құрамын шығарды. Сондықтан ол бұл матчта команданы өрге сүйрейтін ойыншылардың кү­шін босқа сарқығанша, бар назарды келесі турға қаратқан-ды. Бірақ «Арсенал» келесі турда бәрібір негіз­гі құраммен «Брайтонды» жеңе ал­мады.

Жалпы қарсыласына қарағанда әлсіз саналған көп команда осындай стратегиялық қадамға барып жатыр. Испанияда да осы жағдай. Ла Лиганың 29-турында «Эйбар» «Реалға» қарсы өткен ойында негізгі құрамын шығарған жоқ. Өйткені жеңілетінін білді. Ал «Эйбарға» үш күннен кейін өз деңгейіндегі командамен өткен ойын маңыздырақ еді.

Көп жағдайда ойын ырғағы әдет­тегіге қарағанда төменірек. Кейбір ойындар бірінші минуттан соңғы минутқа дейін бір деңгейде өтіп жатыр. Сондай-ақ карантиннен кейінгі матчтарда футболшылардың төрешілермен тартысуы да азай­ған. Өз кезегінде ойыншылар да төрешілердің шешіміне оң көз­қа­распен және сабырлықпен қарап жатыр. Бір жағынан осылай болуы керек сияқты. Біріншіден, әлемдегі жағдай, яғни коронавирус пандемиясы оларды сабырға шақырса, тағы бір себебі жанкүйерлер оларды қолдап-қуаттамаған соң футболшылар да аса қатты эмоцияға беріліп жатқан жоқ.

Жалпы карантиннен кейінгі фут­бол­дың бүгінгі жағдайы осындай... Фут­бол шынымен бұрынғыдай емес...