Екі мүйізі бірдей сынып, денесінің әр-әр жерінде жарақаты бар жабайы аңды облыстық орман шаруашылығы және жануарлар әлемі аумақтық инспекциясының қызметкерлері, полиция, құтқарушылар және жергілікті тұрғындар бар, бәрі жабылып ұстай алмаған соң, Қарағандыдағы хайуанаттар бағына хабарласқан.
Теміртауға жедел жеткен ветеринар маман мен ғылыми қызметкер жанына адам тақалтпай тұрған тағыны жансыздандыратын арнайы дәрімен атыпты. Бірақ жануарға препараттың уыты әсер ете қоймаған. Содан кейін барып бұланды бұғалықтың көмегімен ұстауға тура келіпті.
Қарағандының хайуанаттар бағына аман-есен жеткізілгеннен кейін, ветеринар мамандар бұланға тиісті ем-домды жасаған. Аяқтары мен алқым тұсындағы жарақаттарын жуып-шайып, май жағып, антибиотик егіпті. Мамандардың айтуынша, жаралы жануар шамамен алғанда бір жарым жастағы еркек бұлан екен.
Өкінішке қарай, бұланға ем-дом қонбады. Даланың ерке жануары ертесіне жан тапсырыпты.
Мамандар бұланды сойып, ағзасына тексеру жүргізгенде, оның өкпесі мен бауырының қабынғанын және жүрек-тамыр қызметінің жеткіліксіздігін анықтаған. Ал соңғы түйінді сөзді ветеринар маман айтыпты: бұланның ажалы миокард инфарктісінен болған екен.
ҚАРАҒАНДЫ