"Жұмыспен қамтудың жол картасы": Жұмысшы 150 мың теңгеден астам жалақы алады

Аймақтар • 26 Маусым, 2020

"Жұмыспен қамтудың жол картасы" арқылы 150 мың теңгеден астам жалақы алуға болады

269 рет көрсетілді

Бағдарлама бойынша 3 мыңға жуық жұмыссыз азамат жұмыспен қамтылды, деп хабарлайды елорда әкімдігінің ресми сайты.

Нұр-Сұлтан қаласында "Жұмыспен қамтудың жол картасы – 2020-2021" бағдарламасы сәтті жүзеге асырылуда. "Жол картасы аясында 15 мың адам жұмыспен қамтылады. Қазіргі уақытта бағдарлама аясында 2 956 адам жұмыспен қамтылған. Нысандарда жұмысшылар өте қажет. Бағдарлама бойынша ең аз жалақы 85 мың теңгені құрайды. Бірақ қазір қарапайым жұмысшы 150 мың теңгеден астам жалақы алады", – дейді қалалық жұмыспен қамту орталығының бөлім бастығы Азамат Байтасов. Қазіргі уақытта Бейбітшілік және Келісім Сарайы күрделі жөндеуден өтуде. Мұнда жұмысшылар өте қажет.

"Біз жұмыспен қамту орталығынан 45 қызметкер алдық. Гидрооқшаулау жұмыстары жүргізілуде. Жауын кезінде нысанға су кетеді. Қазір бұл олқылықтар жойылуда", – дейді Бейбітшілік және Келісім Сарайы МКҚК басшысы Дильбар Амирова.

"Жұмыспен қамтудың жол картасы – 2020-2021" мемлекеттік бағдарламасы инфрақұрылымдық жобаларды жүзеге асыруды қарастырады. Бағдарлама аясында жұмыспен қамту орталығы қажетті біліктілікке ие кадрларды іріктеумен айналысады және инфрақұрылымдық жобалар бойынша жұмыс берушілермен сұхбатқа бағыттайды. Жұмыспен қамту орталығы құрылыс, жөндеу, абаттандыру және көгалдандыру саласындағы жұмыстарды ұсынады.

Еске салсақ, Нұр-Сұлтан әкімдігінің жұмыспен қамту орталығы азаматтарға және жұмыс берушілерге еңбек делдалдығы, жұмыспен қамтуға жәрдемдесудің белсенді шаралары, жұмыссыздықтан әлеуметтік қорғауды ұйымдастыру бойынша мемлекеттік қызметтерді ұсынады. Сонымен қатар "Еңбек" және "Жұмыспен қамтудың жол картасы" мемлекеттік бағдарламаларын жүзеге асырады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз