Оқиға • 29 Маусым, 2020

Үздіктер анықталды

18 рет көрсетілді

Елордада «Қазмедиа орталығы» ғимаратында Ақпарат және қоғамдық даму министрі Аида Балаеваның қатысуымен бұқара­лық ақпарат құралдарының қыз­м­ет­керлері күніне арналған сал­та­натты жиын өтті.

inform.kz

Салалық мемлекеттік органның қыз­меткерлері мен отандық БАҚ өкілдері қатыс­қан шара елдегі эпидемиялық жағ­дай талаптарына байланысты онлайн-форматта өтті. Ақпарат және қоғамдық даму министрі барлық журналистер мен БАҚ қызметкерлерін кәсіби мерекесімен құттықтады. «Журналистер – қоғамның жана­шыры. Қоғам тіршілігіндегі кез кел­ген қиындыққа бірінші болып үн қатып, тығырықтан шығар жол іздейтін де журналистер қауымы. Расында да, жур­налистика – шығармашылық өрісті ғана емес, кәсіби өршілдік пен аса терең мә­де­ниеттілікті, жан-жақты білімділік пен ішкі тәрбиелікті қатар талап ететін кір­пияз мамандық. Өйткені ғұлама ғалым­мен де, біртуар дарынмен де, қарапайым қауыммен де тең сөйлесіп, тамырын табу – екінің біріне бұйыра бермейтін дара қасиет, асқақ абырой», деді Аида Балаева.

Министр шынайы ақпарат жеткізуге атсалысқан барлық сала қызмет­кер­леріне ауыр да абыройлы еңбегі үшін риясыз алғысын жеткізді.

Салтанатты шарада жоғары кәсі­би шеберлігі үшін еліміздің бар­лық аймақ­тарынан ондаған медиа қыз­меткер Ақпарат және қоғамдық даму министр­лігінің Құрмет грамотасымен және отан­дық журналистиканы дамытуға ай­рықша үлес қосқан медиа майталмандар «Ақпарат саласының үздігі» төсбел­гісі­мен марапатталды. Санитарлық-эпи­де­миялық жағдайға байланысты марапат тек «Qazaqstan» және «Хабар 24» телеар­наларының журналистері Мақпал Укенова мен Қанат Базылханов, «Aiqyn» және «Казахстанская правда» газеттерінің журналистері Айтжан Мұр­жанов пен Асқар Бейсенбаевқа табыс­талды. «Egemen Qazaqstan» газе­тіндегі әріптестерімізден Александр Тасболат, Бекен Қайрат, жақында ғана  Жамбыл облыстық «Ақ жол» газетінің бас редакторы болып тағайындалған Оралхан Дәуіт, сондай-ақ Гүлназ Ай­мұхамбетова, Гүлмәрия Құдабаева сала үздіктерінің қатарынан табылды.

Сонымен қатар биыл алғаш рет бел­гілі журналист және қоғам қай­рат­­кері, Қазақстан Президенті сыйлы­ғының лау­реаты Бейсен Құранбек атындағы «Жігер» сыйлығы таға­йын­далды. Төрт аталым бойынша конкурсқа қатысу үшін өтінімдер 26 мамыр мен 15 мау­сым аралығында қабылданды. Сыйлықтың алғашқы иегерлері шара барысында белгілі болды. «Әлеуметтік тақырыптағы үздік ТВ сюжет» аталымы бойынша «Хабар 24» телеарнасының қызмет­кері Мерей Шохманова, «Әлеуметтік тақырыптағы әлеуметтік желідегі ең үздік жарияланым» аталымы бойынша Ақжелең Рахатдинқызы, «Әлеуметтік тақырыптағы үздік фотосурет» аталымында Ольга Бугаева және «Әлеуметтік тақырыптағы үздік мақала» аталымында «Егеменнің» Шығыс Қазақстан облысындағы меншікті тілшісі Азамат Қасым жеңіске жетті.

Салтанатты шара кезінде әріптес­терін бейнебайланыс арқылы шетелдік бөлімшелерде жұмыс істейтін отандық БАҚ журналистері құттықтады. Қаты­су­­­шылар 2020 жыл қазақстандық жур­на­л­истер үшін тек коронавирус пан­демия­сымен күреспен ғана емес, сонымен қатар жүздеген нағыз кәсіби шебер­лер­­дің адал еңбегі мен маңдай терінің арқ­а­сында жеткен жетістіктермен есте қала­­тынын атап өтті. Сондай-ақ биыл респуб­ликалық «Казахстанская правда» газеті мен «Қазинформ» халықаралық ақпарат агенттігі 100 жылдық мерейтойын атап өтуде, ал «Хабар агенттігі» АҚ-тың медиа нарыққа шыққанына 25 жыл толып отыр.

Ақпарат және қоғамдық даму ми­нистрі Аида Балаева журналист маман­­­­дығын бойында айрықша азамат­тық ұс­танымы, кең дүниетаны­мы мен жоға­ры адамгершілік құнды­­лықтары бар адам­дар ғана алып жүретінін атап өтіп, барлық БАҚ қауымдастығы өкіл­деріне зор денсаулық, отбасыларына аман­дық, бақыт пен береке тіледі. Мере­келік шара соңында журналис­тер мереке­сіне арнайы жазылған әннің тұсауы кесілді.

Айта кетейік, мереке қарасаңында бас басылым – «Egemen Qazaqstan» газеті­нің көптеген қызметкері Парла­менттің, орталық мемлекеттік органдардың, облыстар мен қалалар әкімдіктерінің, түрлі саладағы құрылымдар мен үкіметтік емес ұйымдардың арнайы марапаттарына ие болды, сондай-ақ бірқатар конкурстың жеңімпазы, жүлдегері атанды. Мәселен, Президенттің Жарлығы­мен тағайындалған «Халық алғысы» медалін газеттің Маңғыстау облысындағы меншікті тілшісі Гүлайым Шымтемірқызы кеудесіне тақты. Басылымның Ақтөбе облысындағы меншікті тілшісі, ардагер журналист Темір Құсайын Парламент Мәжілісінің дәстүрлі конкурсы – «Пар­ламент сөзі» сыйлығының лауреаты атанса, Парламент Сенаты ұйым­дастыр­ған «Туған ел» байқауының бас жүлде­сін газеттің Шығыс Қазақстан облы­сындағы меншікті тілшісі Азамат Қасым иеленді. Бұған қоса Nur Otan пар­тиясының жыл сайынғы «Нұр Сұңқар» республикалық конкурсының «Ұшқыр қалам» аталымын газеттің шолушысы Айгүл Халықова жеңіп алды. Сондай-ақ газеттің Павлодар облысындағы меншікті тілшісі Фарида Бықайды облыс әкімі «Павлодар облысы алдында сіңірген еңбегі үшін» медалімен марапаттады.

 

Соңғы жаңалықтар

Теріскейдің Самалы

Руханият • Кеше

Ұқсас жаңалықтар