Дерт дерегі көп шыққан облыс орталығы мен Степногорск қаласында карантин шектеулері барынша күшейтілетін болды. 24 маусым күні сағат 00.00-ден бастап Көкшетау қаласы карантинге жабылса, маусымның 26-ы күні дәл осындай қатаң шаралар Степногорск қаласында жүзеге асырылды. Барлық көлік түрлері бұл қалалардың аумағына кіріп-шығуға тыйым салынды. Тек транзиттік жүк көліктері мен азық-түлік тасымалдайтын көліктерге ғана рұқсат етіліп отыр. Тиісті органдар екі қала тұрғындарына да сақтану шаралары туралы түсінік жұмыстарын жүргізуде.
– Өңірімізде коронавирус пандемиясымен күрес біршама тиянақты жүргізілуде, – дейді облыстық тауарлар және көрсетілетін қызметтердің сапасы мен қауіпсіздігін бақылау департаментінің басшысы Айнагүл Мусина, – халықтың денсаулығын сақтау үшін қажетті барлық шаралар қолға алынуда.
Басқарма басшысының айтуына қарағанда, негізінен антибактериалды терапияға цефриаксон, цефтазидим, цефуроксим, лавофлоксацин тәрізді препараттар қолданылады екен. Бүгінгі таңда бұл дәрілерге медицина мекемелері тарапынан сұраныс артып отыр. Дәрі-дәрмектің тапшылығының басты себебі, баға айырмашылығында тәрізді. Мәселен, дәріханаларда қымбат препараттар жеткілікті мөлшерде болғанымен, көпшілік жиі тұтынатын арзанқолды дәрі-дәрмек сөрелерде жатпайтын көрінеді. Осыдан барып ел ішінде дәріханаларда дәрі жоқ деген қауесет тарап кеткен.
Өңірдегі медицина мекемелерінің дәрі-дәрмек қоры үстемелеп толтырылмақ. Бүгінгі таңда «Арша» медициналық кәсіпорны Көкшетаудың медицина мекемелерін дәрі-дәрмекпен қамтамасыз етіп келеді. Бұл кәсіпорын үш дәріханасы арқылы дәрі-дәрмек сатуда. Басшыларының айтуына қарағанда, аспирин, парацетамол сынды әдетте жиі қолданылатын дәрілер жеткілікті.
Орын тапшылығын жою үшін Есіл мен Жарқайың аудандарында, Атбасар қаласында жаңа орындар жасақталуда. Облыс әкімінің орынбасары Мәлғаждар Тәткеевтің айтуынша, Бурабай ауданында елді мекеннен біршама алыстау орналасқан жастар ғимараты бос тұр. Ендігі мәселе, ғимарат иесімен келіссөз жүргізу.
Облыс орталығында жүк тасымалдауды сылтауратып, заңсыз кірген тұрғындар да анықталған. Бұл мәселені шешу үшін тәртіп сақшылары мен медицина мамандары тәулік бойы карантин шараларын қатаң бақылайтын болады. Блок бекеттерде жұмыс істейтін барлық қызметкерлерге арнайы талап қойылған. Олар әрбір екі сағат сайын бекет аумағын зарарсыздандырып отыруы тиіс. Барлығы арнайы киімдермен және қажетті құрылғылармен қамтамасыз етілген.
Ақмола облысы
