Кеншілер астанасында Saryarqa телеар­насының эфирінде өткен брифингте өңірдің бас мемлекеттік санитарлық дәрігері Қанат Асқаров Қарағанды облысында 27 мау­сымнан бастап карантиндік шектеулердің күшейтілетінін мәлімдеген болатын.

Брифинг барысында ол бұл шешімнің қандай себептермен  қабылданғанын егжей-тегжейлі түсіндірді. Індеттің өршуі­не маскалық режім мен әлеуметтік қашық­тықтың сақталмауы бірден-бір себепкер болған. Яғни тұрғындар карантин жағ­дайында қойылатын талаптарды тіпті де елең қылмайды екен. Қауіпсіздік ережелерін адамдардың өздері де, кәсіпорындардың әкімшілігі де сақтамайтын көрінеді.

– Арнайы құрылған мобильдік топ қызметін қайта бастаған 153 нысанды тексергенде, ол жерлерде бас мемлекеттік санитарлық дәрігері қаулысының талаптары бұзылғанын анықтады. Негізінен, мұндай жағдайлар  қоғамдық тамақтану, сауда, қоғамдық көлік нысандарында анықталды, – деді Қ.Асқаров.

Міне, осындай күрделі жағдайда коронавирус инфекциясының әрі қарай  таралуына жол бермеу мақсатында бүгін­нен бастап қосымша шаралар енгізі­летін болды. Бір сөзбен айтқанда, Қараған­ды облысы бойынша карантин режімі қатаңда­тылады. Атап айтқанда, халыққа қызмет көр­сету орталықтары қысқартылған жұ­мыс күні тәртібіне көшіп, сағат 09.00-ден 14.00-ге дейін ғана жұмыс істейді. Мемлекеттік қызметтердің басым бөлігі онлайн режімінде ұсынылады. Қала ішінде қоғамдық көліктердің жүру уақыты шектеліп, енді олар сағат 06.00-ден 21.00-ге дейін ғана тұрғындарға қызмет көрсете алады. Жолаушылар салонға алдыңғы есік арқылы ғана кіретін болады. Ал шығар кезде барлық есіктер бір мезетте ашылуы тиіс. Бұл талаптардың сақталуы қатаң түрде бақылауға алынады. Таксилерге тек бір жолаушыны немесе кәмелетке толмаған екі баланы ертіп жүрген бір ересек адамды ғана тасуға рұқсат беріледі.

Аурудың айылын жимай тұрғанына от­ба­сылық түрлі жиындар, той-томалақ, еске алу іс-шараларының тыйылмай тұр­ғаны да түрткі болып отыр, дейді облыстың бас мем­лекеттік санитарлық дәрігері. Мұ­ның бәрі коронавирус инфекциясы жағ­дай­ларына талдау жүргізу барысында мәлім болған.

– Көптеген жағдайларда науқастар өз­дері­нің ауру жұқтыруын үй жағдайында, мейрамханаларда, дәмханаларда өткізілетін түрлі жаппай салтанатты, отбасылық, еске алу іс-шараларына қатысқаны­мен байланыстырады. Індет одан әрі өрші­ген жағдай­да, амал жоқ, қоғамдық тамақ­тандыру нысандарының жұмысын үйге жеткізіп беру режіміне ауыстыру мәселесі қаралады, – деді Қ.Асқаров.

Бұдан бөлек, бұрын енгізілген каран­тиндік шектеу шаралары сол беті қалады. Мәселен, 65 жастан асқан адамдарға аса қажетсіз көшеге шығу шектелген. Жасы 14-ке дейінгі балалардың ересектерсіз жүруіне, отбасы мүшелерінен басқа, үш адамнан артық адамдардың жиналуына тыйым салынады. Қоғамдық тамақтану нысандарында келушілердің саны 30 адамға дейін шектелген, әлеуметтік арақашықтық пен отырғызу және жұмыс тәртібі сағат 08.00-ден 22.00-ге дейін сақталады. Бұқаралық (ұжымдық) іс-шараларды өткізуге тыйым салынады. Сондай-ақ сауда-ойын-сауық орталықтарының, сауда үйлерінің (орталықтарының), азық-түлік және азық-түлік емес базарларының жұмыс күндері мен демалыс күндері жұмыс уақыты шектеулі. Демалыс СОО, сауда үйлері және азық-түліктік емес дүкендер сағат 9.00-ден 13.00-ге дейін жұмыс істейді. Базарлар міндетті санитарлық күнге жабылады.

Облыстың бас санитарлық дәрігері бетперде тағудың дым көмегі жоқ деген ағайынның пікіріне қарсы нақты дәлелге негізделген уәж айтты.

– Бетпердені тағып жүру індет жұқтыру­дың алдын алуға көмектеседі, – деді ол.  Дұрыс пайдаланған жағдайда бұл маска вирус жұқтырған адамның сілекей шашырандыларын жібермей ұстап қалады. Сонымен қатар, ол кірленген қолдары бетіне жиі тие­тін адамдардың ауыз бен мұрын қуысы ішін­дегі шырышты қабаттарын қорғайды. Мәсе­лен, ауырмаған адамның қолына микроб тозаңы жұғады да, оның былғанған сол қолдары бетіне тиеді. Содан барып мик­ро-­­­­

организм мұрын, ауыз, көздің шы­рыш­ты қабаттарына жұғып, әлсіреген имму­ни­теттің жағдайында ағзаға түгел тарайды.

Брифинг соңында Қарағанды облыстық тауарлар мен көрсетілетін қызметтердің сапасы мен қауіпсіздігін бақылау департа­ментінің басшысы Қ.Асқаров тұрғындарды карантиндік шектеу талаптарын қатаң сақтауға шақырды.

Облыстың бас мемлекеттік санитарлық дәрігерінің тұрғындарды дәл осылайша тәртіпке шақырып келе жатқанына да біраталай уақыт болды. Бірақ ащы да болса айтайық, ауа жайылған жұрттың оған құлақ асар түрі көрінбейді. Өткен жексенбі күні өңірде тағы да 137 адамның коронавирус инфекциясын жұқтырғаны зертханалық негізде расталды.

ҚАРАҒАНДЫ