Нашақорларға қарсы күрес тоқтамайды

Аймақтар • 03 Шілде, 2020

Нашақорларға қарсы күрес тоқтамайды

18 рет көрсетілді

Кеше Солтүстік Қазақстан облыстық ПД Есірткі қылмысына қарсы іс-қимыл басқармасының бастығы, полиция полковнигі Жандос Басыбаев журналистерге брифинг беріп, өңірдегі нашақорлықтың ахуалы туралы баяндап берді. Оның айтуына қарағанда облыста тіркелген қылмыстың 2,1 пайызы есірткімен байланысты екен. 2020 жылдың 2 тоқсанынының қорытындысы бойынша облыста 636 адам есірткіқұмар ретінде есепке алынған. Соның ішінде 514 адам облыс орталығының тұрғындары. Осы жылдың басынан бері оларға 41 рет жедел жәрдем барып, есірткіні артық тұтынудың кесірінен ажал аузына жетіп қалғанда құтқарған.

Жақсыбай САМРАТ

Есірткі айналымына байланысты қылмыс та азайып тұрған жоқ. Жыл басынан бері ондайдың 103 анықталған. Бұл былтырғы жылдың сәйкес мерзімімен салыстырғанда сәл аздау болғанымен түпкілікті азаймай тұр.

Алғашқы жартыжылдықта облыс бойынша 175 кг есірткі заттары тәркіленді. Олардың негізгі бөлігі марихуанаға жатады. Бұлардың көбі өңірге еліміздің оңтүстік жағынан жеткізіледі немесе жергілікті шикізаттардан жасалады. Ал синтетикалық есірткілер Ресей мен Қытайдан жеткізіледі.

Қазір есірткі таратуда Интернет технологияның қолданылуы артып барады. Соңғы кезде ғана осындай төрт қылмыс фактысының жолы кесілген. Ал қаңтар айында 5458 дозаны осылай сатпақ болған ұйымдасқан топ ұсталған. Маусым айында 18 жасар қыздың 667 дозаны Интернет арқылы белгіленген құпия орындарға қойғаны анықталды.

Нашақорлар өздеріне белгілі сөздермен есіктердің немесе үйлердің қабырғасына ілінген хабарландырулар мен жарнамалардың арасына есірткіні қайдан алуға болатындығын жазып кетеді. Сондықтан есірткіге қарсы күрес қызметі үйлердің ПӘК төрағаларымен келісіп, ондайлардың үстінен сыр жүргізіп отырады. Сондай-ақ «Паутина», «Транзит», «Допинг», «Қарасора – 2020» жедел-профилактикалық шараларының барысында есірткі ошақтарын әшкерелеу жиі болып тұрады.

ПЕТРОПАВЛ