Технология • 14 Шілде, 2020

Байыту фабрикасы бой көтереді

16 рет көрсетілді

Таскөмірімен төрткүл дүниеге танымал болған Қарағандыда отынның осы түрін байыту бойынша елімізде теңдесі жоқ фабрика салынбақ. Мұндай батыл мәлімдемені арнайы өткен брифинг барысында Qaz Carbon компаниясының акционерлері Ерлан Нығматулин, Давид Кемертелидзе және ҚДБ басқарма төрағасы Абай Сарқұлов жасады.

Аталған фабрикада күлі аз, жоғары сапалы кө­­мір байы­тылатын болады. Инвес­тор­лардың жоспары бойынша өндірістік нысан 2021 жылға қарай іске қосылуға тиіс екен.

Жалпы құны 12 млрд теңге болатын жобаны жүзеге асыру мақсатында кәсіпкерлер үшін «Қазақстанның даму банкі» АҚ тарапынан жеті жыл мерзімге деп 9 млрд 24 млн теңге мөлшерінде несие желісі ашылыпты. Яғни қарыз қаражаты компанияға Қазақстан Республикасының индустриялық-инновациялық дамуының 2015-2019 жылдарға арналған мемлекеттік бағдар­ламасы аясында ұсынылған. Қалған 3 млрд теңге шамасын­дағы қаржыны инвесторлар құрылысқа өз жанынан салады.

Жаңадан бой көтеретін кә­сіпорын сапалы көмір өндіріп қоймай, қоршаған ортаға зиян келтірмейтін нысан ретінде жақсы атқа ие болмақшы. Мысалы, фабрикадағы байы­ту үдерісі су тұндыратын бас­­сейндер үшін сонша көп аумақ­ты қажет етпейтін жа­бық бөлмеде іске асырылады. Автоматты және электрон­ды жаңа технологиялар ар­қы­лы өндірістің барлық кезең­дерін кәсіпорынның басқару орталығынан оператор бақы­лайтын болады. Жобаның бү­гін­гі күнде қоршаған ортаға әсерді бағалау мемлекеттік экологиялық сараптамасынан өткенін де айта кеткен жөн.

Брифингте Qaz Carbon ЖШС-ның акционері Ерлан Нығматулин көмірді байыту үшін ылғалды байыту технологиясының қолданы­латынын мәлім етті. Яғни ол пайдалы қазбаларды шикі­заттың жалпы тау-кен массасынан барынша ажыратып алуға мүмкіндік береді.

– Байытудың барлық рәсі­мі химиялық реагенттерді қол­данбай жабық циклде өтеді. Бұл қоршаған ортаға әсер етудің тазалығына алып келеді және жалпы жобаның экологиялық оң әсерін едәуір арттырады. Байыту фабрикасындағы өн­дірістік үдерістерді автомат­тандырудың жоғары деңгейі дайын өнімнің сапасы мен технологиясының сақталуын бақылауға мүм­кін­дік береді. Фабриканың қуат­тылығы саға­тына 300 тонна немесе жылына 1 800 000 тонна болады, – деді ол.

Шикізат ретінде Қарағанды өңірінің көмірін пайдаланатын жаңа кәсіпорын дайын өнімді экспортқа шығаруды көздейді. Одан бөлек, Қарағанды ферро­қорытпа зауытында – YDD Corporation компаниясында пай­далану да жоспарда бар екен.

Бұл жөнінде Qaz Carbon ЖШС-ның акционері Давид Кемертелидзе тарқатып айтып берді.

– Қазақстанда ірі инвес­тициялық жобаларды іске асыру бойынша мол тәжірибеміз бар. Сондықтан алыс және таяу шетел нарығының, сонымен қатар ішкі нарықтың қа­жетін зерттей отырып, жаңа жобаларды іске асы­­­руды қолға алдық. Іс жү­зін­де Қазақстанда бірегей инвестициялық ахуалдың қа­лыптасқанына ғана емес, сонымен бірге қосылған құны жоғары өнім жасау үшін үлкен шикізат базасы бар екеніне көз жеткіздік, – деп атап өтті кәсіпкер.

Брифинг барысында «Қазақ­станның даму банкі» АҚ­ Бас­қарма төрағасы Абай Сарқұлов бұл жобаны іске асыру Мемлекет басшысы­ның инвестиция тарту, өң­деу өнеркәсібіндегі еңбек өнім­ділігін арттыру жөніндегі тіке­лей тапсырмаларының орындалуына игі әсерін тигізетінін айтты.

Заманауи кәсіпорын жұмыс істей бастағанда 110 адамды тұрақты жұмыспен қамтитын болады. Ал нысан құрылысы кезінде 500-ден астам адам жұмысқа тартылмақ. Ал зауыт, жоғарыда айтқанымыздай, өз өнімдерін экспортқа шыға­ратын болады. Мұның өзі елі­міздің экспорттық әлеуетін да­мытуға үлес қосады деген үміт­ке негіз береді.

 Қаржыландырудың екінші бөлігі қазір жұмыс істеп тұр­ған құю өндірісімен айналысатын зауытты жаңғыртуға бағыт­талады. Ал бұл өз ке­зе­гінде болат және шойын өнім­­­дерін шығару бойынша қолданыстағы қуаттарды ұл­ғай­туға мүмкіндік береді. Еске салар болсақ, аталған зауыт 2018 жылы шетелдік инвесторлардың қатысуымен ауқымды жаңғыртудан өткізіл­ген болатын. Бұл кәсіпорын негізінен шойын және болат өнімдерін шығарумен, кокс және жартылай кокс өндірумен айналысады. Жыл­дық жобалық қуаты 120 мың тонна болатын­ зауыт 900-ден астам болат және шойын өнімдерін шығарады.

Зауытты жаңғырту бо­йынша инвесторлар екі жыл ішінде 8 млрд теңгеден ас­там жеке инвестиция салып, 1 216 жаңа жұмыс орнын ашқан. Компаниядағы қыз­­меткерлердің орташа жа­­­лақысы 245 мың теңгені құ­райды. Былтыр компания тарапынан мемлекетке 2,1 млрд теңге мөлшерінде салық төленген. Qaz Carbon ЖШС-ның жаңа жобаларын жүзеге асыру аймақ экономикасын әртараптандыруға серпін береді және соңғы буын технологияларының трансферті есебінен еңбек өнімділігін арттыруға сүбелі үлес қосады.

 

ҚАРАҒАНДЫ

 

Соңғы жаңалықтар

Адасқан балалар аман-есен табылды

Аймақтар • 07 Тамыз, 2020

Ұқсас жаңалықтар