Медицина саласында 40 жылға жуық еңбек етті. Әріптестерінің айтуынша, осы мерзімде арына да, ақ халатына да дақ түсірмеді. Үнемі ізденді. Мамандығына адалдығынан айнымады. Дертіне шипа іздеп келген науқастардың үлкенін туысындай, кішісін баласындай көрді. 1998 жылы №2 облыстық инфекциялық ауруханаға ауысты.
– Жұмабек Бағытұлы бұл ауруханада алғашқыда реанимотолог, кейін өмірден өткенге дейін инфекционист болып еңбек етті. Аймаққа есімі кеңінен тараған дәрігердің уақытпен санасқанын көрмедік. Өз ісіне үлкен жауапкершілікпен қараушы еді, – дейді №2 облыстық инфекциялық аурухана директорының кеңесшісі Аслан Жеңісұлы.
Онымен әріптес болғандардың бәрі адами болмысы ерекше екенін алға тартады. Өйткені Жұмабек Дәулетов 40 жылға жуық дәрігерлік еңбек жолында оба, холера, сібір жарасы секілді вирусты індетпен ауырған жандарға емімен де, жылы сөзімен де шипа дарытты. Ауруханада жетіспейтін дәрігерлердің міндетін қоса атқарудан ешқашан тартынбады. Тіпті, талай рет қан қысымы көтеріліп отырса да, жұмыс орнын тастап кетпегенінен кәсібіне адалдықтың үлгісі байқалады.
– Ол дәрігерлік антына адал, ақ халаты секілді жүрегі мейірімге толы, пейілі кең, таза жан, жас буынға ақылын айтып, жөн сілтер тәлімгер болды. Ұдайы ақ халатымыздай арымыз да таза болуы керек дегенді айтып отыратын, – деп қимастықпен еске алады әріптестері.
Облыстық медициналық жедел жәрдем стансасының фельдшері Алмагүл Демесінованың жасы елуге де толмаған екен. Бірақ еңбексүйгіштігімен, ақкөңілдігімен әріптестерінің есінде қалды. Өйткені ол да қауіпті індетке қарсы күрестің алғы шебінде жүрді. Сөйтіп, өз өмірін құрбан етті.
Әріптестерінің пікіріне сүйенсек, Алмагүл Демесінова 1991 жылы Гурьев медицина училищесіне «фельдшер» біліктілігі бойынша оқуға түсті. Училище қабырғасындағы алғашқы күннен зеректігімен, тапқырлығымен қатарластарынан ерекшеленіпті. Оқуын бітірген соң бірден облыстық жедел жәрдем стансасына жұмысқа орналасқан.
– Алмагүл ешқашан тартыншақтамайтын. Жұмыс десе жанып түсетін еді. Біз оны әрқашан мақтан тұтушы едік. Бәріміз де әйелміз ғой. Ал ол бәрімізден өзгеше болатын. Уақытпен санасуды білген жоқ. Кейде жедел жәрдемге баратын бригадада фельдшер жетіспей жатады. Сондайда ауысымы аяқталғанына қарамастан, шақыртуға кете беретін. Жастарға өмірлік тәжірибесін үйретуден де жалыққан жоқ, – дейді облыстық жедел жәрдем стансасы директорының орынбасары Гүлнафис Рахметова. – Оның атына пациенттерден ұдайы алғыс хат жиі келетін. Бұл да Алмагүлдің өз ісін абыроймен атқарғанына куә боларлық дерек. Наурыздан бері қауіпті індетке қарсы күрес бригадасында еңбек еткен еді.
Бір өкініштісі, тажалға қарсы тұрған ақ халатты жандар көп жылғы еңбегінің еленгенін көре алмады. Дегенмен Президент Жарлығымен Жұмабек Дәулетов «Құрмет», ал фельдшер Алмагүл Демесінова ІІІ дәрежелі «Барыс» орденімен марапатталды. Әрине, өмірден өткен соң...
АТЫРАУ
