Оқиға • 21 Шілде, 2020

Жылы жүректен шыққан жәрдем

29 рет көрсетілді

Қайырымды істерімен көпке үлгі болып жүрген көкірек көзі ояу, жүрегінде иманы бар адамдар қатары көбейе түсері күмәнсіз. Бүгінгідей қиын сәтте ел ішінде елеусіз ғана қайырымдылық істердің ұйытқысы болып жүрген және оны жария еткенді қаламайтын жандар қаншама. Өйткені ата-бабаларымыздың: «Біреудің өзіңе жасаған жақсылығын ешқашан ұмытпа, өзіңнің жұртқа жасаған жақсылығыңды ұмытып кет, ешкімге міндет қылма, мақтанып, жұртқа айтпа», деген өсиетін ұмытпаған ұрпақпыз. Дегенмен, жақсылықты ұмытпайтын, әсіресе жаны қиналған жақынына қолұшын созғандарға алғысын жұртқа жария ете білдіргісі келетін жандар көп.

Мысалы, Түркістан облысы Созақ ауданының тұр­ғын­дары жергілікті кәсіпкерлерге шексіз алғыстарын білдіруде. Оның өзіндік себебі де бар. Облыстық мәслихаттың депутаты, кәсіпкер Мағауия Тұрыс­беков Түркиядан 5 жасанды тыныс алу аппаратын алдыртып, аудандық орталық ауруханаға табыс етпек. «Індет белең алып тұрғанда, мұндай оттегі концентраторларының науқас­тар үшін пайдасы зор. Адам өкпесі зақымданғанда оттегі жетпей қиналады. Бұл аппарат көптеген адамның өміріне араша болады. Осы уақытқа дейін кәсіпкер Базарбай Нұрланов 2 оттегі концентратын сыйға тартты. Жалпы, ауданның азаматтарына үлкен алғысымды айтамын. Атын атамауды өтінген тағы бір кәсіпкер аурудың ортасында жүрген дәрігер, медбике, санитар, науқас жандарға құнарлы тамаққа деп 300 мың теңгенің ас-ауқатын ауруханаға жеткізіп берді. Тау­кент кентіндегі провизорлық ор­талыққа «Сауран» ЖШС-ның бас директоры Марат Оспан, жеке кәсіпкер Нұржан Мұханов есімді аза­маттар қой сойды. Гүлзада Төленова өз қаржысынан меди­цина қызметкерлеріне арнап 100 дана бетперде тікті», дейді аудандық орталық аурухананың бас дәрігері Талғат Қалдыбеков.

Ауданның тумасы Мағауия Тұрыс­беков жомарт­тығымен жұртқа жақсы таныл­ған жан. Ол өз қаржысына аудан­дық арда­герлер үйін, Nur Otan пар­тия­сының ғимаратын салып берген бо­латын. Сондай-ақ төтенше жағдай кезінде «Біз біргеміз!» акциясы аясында жағдайы төмен 200 отбасына азық-түлік таратқан азамат, енді науқастарға қиын сәтте де көмек беруді мақсат етіп отыр.

Ауруханаларға қажетті құ­рыл­ғы­лар алу, дәрігерлерді қолдау бағы­тын­дағы сауапты іс жасап жүрген жомарт жандар облыстың барлық аудандарында бар. Мысалы, Түлкібас ауда­­нының ерікті тұрғындары аудан­­­дық ауруханаға қазіргі таңда таза­­лық үшін аса қажетті 5 бірдей авто­мат­тандырылған кір жуу машинасын тарту етті. Ал Абайыл мен Жас­ке­шу ауылының азаматтары ортаға қар­жы жинап, 30 мұқтаж отбасына құр­бан­дыққа шалынған 2 ірі қара мен 2 қойдың етін, бірінші қажеттіліктегі азық-түлік жинағымен бірге таратты. Бұған дейін түлкібастық демеушілер мен еріктілер ор­талық ауруханаға 210 оттегі баллонын тарту еткен болатын.

Жалғасын табар қайы­рым­­­ды­лық істердің бірқатарын ғана айтып өттік. Жомарт жандар­дың қол­­дауынан жақсы хабардар өңір тұр­­ғындарына адам бірінші кезекте өзі­нің денсаулығын сақ­тау арқылы да ай­наласындағы жандарға пайдасын тигізетіні жиі ескертілуде.

 

Түркістан облысы

 

Соңғы жаңалықтар

Шенеунікке де шындық керек

Қоғам • Бүгін, 18:07

Үлгі болар игі іс

Қоғам • Бүгін, 15:00

Доллар бағамы арзандады

Экономика • Бүгін, 12:30

Ұқсас жаңалықтар