Орталық коммуникациялар қызметінің алаңында Нұр-Сұлтан қаласындағы №5 емхананың директоры Алтыншаш Табулдина және №9 емхананың директоры Сәуле Смағұлова пандемия жағдайындағы амбулаториялық-емханалық ұйымдардың қызметі жөнінде айтып берді.
Алгоритмге сәйкес емхана мамандары күн сайын КВИ-дің жеңіл және симптомсыз түрімен ауырған тұрғындарға қоңырау шалып, хабар алып тұрады. Жалпы дәрігерлер науқастардың жағдайын, дене қызуын біліп, жөтел, тыныс алудың нашарлауы, әлсіздік, тершеңдік, диарея, бөртпе сияқты белгілердің бар-жоғын анықтайды.
«Клиникалық симптомдар пайда болып, жағдайы нашарлаған науқастарды ауруханаға жатқызу қарастырылады. Ондай тұрғындарды компьютерлік томографиядан өткізіп, қажетті талдаулар жүргізіп, әрі қарай ауруханаға жатқызылады. Дене қызуы үш күннен артық емес және симптомдар болмаған жағдайда ПТР-тестті қайта тапсыру қажетсіз науқасты бақылаудан алып тастаймыз. Сондай-ақ COVID-19 анықталған, бірақ симптомсыз науқастар санаты бар. Біз оларды 14 күн бойы байқаймыз. Егер осы кезеңде ешқандай симптомдар байқалмаса, науқас өзін жақсы сезінсе, біз оны қандай да бір зерттеу жүргізбестен, соның ішінде ПТР-диагностикадан өткізбестен бақылаудан алып тастай аламыз», деді Алтыншаш Табулдина.
Оның айтуынша, амбулаторлық кезеңде адамдардың өзін өзі емдеуі, дәрі-дәрмектерді өз бетінше сатып алуы, тіпті кейбіреуі тамшылатып дәрі егуі күрделі мәселе болып тұр.
Ал №9 емхананың директоры Сәуле Смағұлова барлық амбулатория-
лық-клиникалық ұйымдарда COVID-19 анықтау үшін ПТР-диагностика үшін биоматериал алынатын провизорлық бөлімшелер, науқастарды шұғыл қабылдауға арналған қосымша фильтр-кабинеттер ашылғанын жеткізді.
Емханаларда жұмыс істейтін мобильді бригадалар науқастарды үйіне барып қарайды, температурасын, артериялық қан қысымын, тамырдың соғуын, қандағы оттегі мөлшерін өлшейді. Аурудың белгілері байқалған жағдайда, ПТР-диагностикаға биоматериал алады. Соның қорытындысы бойынша емдеу тағайындалады.
Сонымен қатар емханаларда амбулаториялық дәрі-дәрмекпен қамтамасыз ету бригадалары жұмыс істейді. Олар созылмалы аурулары бар адамдарға дәрі-дәрмекті үйге жеткізіп береді.
Барлық бейінді мамандар мен учаскелік терапевттер қашықтан онлайн-режімде жұмыс істейді. Ол үшін мобильді қосымша арқылы учаскелік дәрігердің қабылдауына алдын ала жазылуға және онлайн-режімде медициналық кеңес алуға болады. Қажет болған жағдайда учаскелік дәрігер бейінді маманға кеңес алуға жібереді.
Сұрақ-жауап барысында дәрігерлер тұмауға қарсы екпе егу туралы айтты.
«Тұмауға қарсы екпе егу Ұлттық егу күнтізбесіне кірмейді. Бірақ жергілікті бюджет есебінен диспансерлік есепте тұрған, созылмалы аурулары бар адамдарға, қауіпті топтағы балаларға, жүкті әйелдерге, сондай-ақ медицина қызметкерлеріне жыл сайын екпе сатып алынады. Менің ойымша, осы жылы бұл жұмыс жалғасын табады және вакцинаны қажет болған жағдайда ертерек өткіземіз», деді №5 емхананың директоры.
Аталған емханада COVID-19 індетінің жеңіл түрі анықталған 16 жүкті әйел дәрігерлердің ұдайы бақылауында болып, нәтижесінде барлығы дені сау баланы дүниеге әкелді.
