Үкіметаралық келісімнің арқасында білім алуға қол жеткізген түлектер "Есептеу техникасы және бағдарламалық қамтамасыз ету", "Информатика" және "Құрылыс" білім беру бағдарламалары бойынша болашақ мамандықтарының қыр-сырын игерді. Сонымен бірге, олардың аталған оқу орнының қоғамдық және шығармашылық өміріне белсене қатысқанын да айта кеткен жөн.
Ауғанстандық жастар IT-технологиялар, заманауи азаматтық кешендер мен ғимараттар құрылысы бойынша тақырыптарға арналған дипломдық жобаларды сәтті қорғады. Олардың ішіндегі бірнеше түлек ҚарМТУ-дың магистратурасында, сондай-ақ Канада мен Түркияның жоғары оқу орындарында әрі қарай білім алуды жоспарлап отыр.
Айта кету керек, ҚарМТУ-да шетелдік студенттер үшін барлық жағдай жасалған. Олар 2014 жылы президенттік "Студенттік баспана" бағдарламасы бойынша салынған "Армандастар Ордасы" тұрғын үй кешенінде тұрды. Мұнда оқу үшін мультимедиялық компьютерлік сыныптар, конференц-зал жабдықталған. Физиокабинет пен асхана және денсаулық пункті бар.
Университеттің халықаралық ынтымақтастық орталығы мен деканаттар шетелдік студенттерге қажетті көмек көрсетті. Көші-қон және жергілікті полиция қызметтерінің өкілдерімен, дінтанушылармен, Ауғанстан Ислам Республикасы елшілігінің қызметкерлерімен кездесулер ұйымдастырылып отырды.
Еске салсақ, биылғы түлектер – Ауғанстаннан келіп білім алып жатқан студент жастар арасындағы алғашқы қарлығаштар.
Қарағанды облысы
