"Абай шапағаты" қоры 10 мұқтаж отбасыға 42 500 теңгеден берді

Қазақстан • 26 Шілде, 2020

"Абай шапағаты" қоры 10 мұқтаж отбасыға 42 500 теңгеден берді

71 рет көрсетілді

Күні кеше ғана "Абай шапағаты" Халықаралық қайырымдылық қоры Құрбан айт мерекесі қарсаңында "Жақыныңа жанашыр бол" атты акция бастады. Алғашқы акцияда меценат Толқын Ақанұлының демеушілігімен көмекке мұқтаж 10 отбасыға 42 500 теңгеден табысталды, - деп хабарлайды Egemen.kz

Маржан ӘБІШ

"Бүгінгідей қысылтаяң шақта көптеген игі іс-шаралардың куәсі болып жүрміз. Соның бірі - осы айтыс ақындарының бастамасымен жасалып жатқан акция. Бұл шараға жеке кәсіпкер ретінде демеушілік көрсеттім. Жағдайы төмен он шаңыраққа қаржылай қолдау білдірдік", деген қайырымдылық акциясының бас демеушісі Толқын Ақанұлы бұл індеттің қазақ отбасыларына оңай тиіп жатпағанын да айтып өтті.

Қор өкілдерінің сөзінше, акция аясында әзірге тек елордалық тұрғындарға көмек көрсетілді. Алдағы уақытта өңір-өңірді аралау жоспарда бар екен. Айтыскер ақын Әсем Ережеқызы игі бастама туралы:
- Құрбан айт мерекесі қарсаңында болғандықтан әуелі 10 отбасына 10 қой апармақ болғанбыз. Кейін ақылдаса келе 42 500 теңгені қолай көрдік. Ал қордың атауын Абай атамыздың 175 жылдығының құрметіне осылай атадық.
Қор - кәсіпкер, жомарт азаматтардың қолдауымен жұмыс істейді. Тек Нұр-Сұлтан қаласымен ғана шектеліп қалмай, алдағы уақытта аймақтарға да шығамыз деп жобалап отырмыз. Абай бар қазаққа ортақ болғандықтан, Абайдың шапағаты да барша жұртқа тиюі тиіс.
Содан кейін, Абай есімінің төңірегіне елді шоғырландырып, Абайды жан-жақты ашып, тәпсірлеп, насихаттауға бағытталған жобаларды қаржыландырсақ. Абай арқылы жалпы қазақтың ұлттық ұстанымын да насихаттауға болады ғой. Арнайы Абай порталы (энциклопедиялық сайт десек те болар), қысқа роликтер, қысқаметражды фильмдер, Қара сөздердің желісі бойынша бейнефильмдер, - деді.

Айта кетейік, аталған қайырымдылық акциясы айтыскер ақындардың мұрындық болуымен ашылып отыр. Дәулеткерей Кәпұлы, Әсем Ережеқызы, Серікзат Дүйсенғазы, Айбек Қали, Еркебұлан Қайназар сынды қоғам қайраткерлері жетекшілік ететін бұл қор әлемді жайлаған індеттің салдарынан күйзеліске ұшырап жатқан сан мыңдаған әлеуметтік жағдайы төмен отбасыларға жәрдем беру мақсатында құрылған.

Күннің маңызды және өзекті жаңалықтарын «Егемен Қазақстан» телеграм каналынан оқыңыз