Шипаның шарапаты

Аймақтар • 27 Шілде, 2020

Шипаның шарапаты

8 рет көрсетілді

Nur Otan партиясы Түркістан облыстық филиалының ұйымдастыруымен, пандемия кезінде елге көмектесу мақсатында өңірде «Өмір» және «Шипа» жобалары жүзеге асырылуда. Жуырда «Шипа» жобасы бойынша облыстың аудан қалаларындағы 300 мұқтаж отбасына дәрі-дәрмек қорапшасы жіберілді.

Ғалымжан ЕЛШІБАЙ

Қорапша ішінде Қоғамдық денсаулық басқармасы тарапынан ұсынылған, коронавирус пен пневмония сырқаттарының алдын алуға, емдеуге арналған дәрілер мен құралдар бар. Дәрі-дәрмектер қорапшасын дайындап, оны ауылдардағы әлеуметтік жағдайы төмен, аз қамтылған көпбалалы отбасыларға тарату көзделген «Шипа» жобасын жүзеге асыруға ерікті жастар қолдау көрсетуде. Яғни Jas Turkistan еріктілер клубы мен аудандардағы жасотандықтар тұрғындарға жеткізуде. Көпшілік дәріханаларда тапшы болып жатқан дәрі-дәрмек салынған қобдишалар Отырар ауданындағы әлеуметтік жағдайы аз қамтылған 10 отбасына таратылды. Қазығұрт ауданының Рабат елді мекеніндегі 2 отбасына да осындай қобдишалар жеткізілді. Ал Кентау қаласында «Өмір» жобасы аясында қалалық мәслихат хатшысы Талғат Балабиевтің және кәсіпкер Ерлан Рүстемовтің қолдауымен қалалық орталық ауруханасына 2 жасанды тыныс алу аппараты табыс етілді. «Біз осындай қадамдар арқылы тұрғындарға көмек қолын созуды мақсат тұттық. Партия филиалына, нұротандық депутаттарға, демеушілерге, волонтер жастарға алғысымыз мол», дейді партияның Jas Otan жастар қанаты облыстық филиалының төрағасы Жансерік Жұман. Иә, жобалардың мақсатынан хабардар болған ел жанашырлары, облыстық мәслихаттағы Nur Otan партиясының фракция өкілдері мен өзге де азаматтар қолдау көрсетіп, алғашқы күндері арнайы қорға 10 млн теңгеден астам қаржы аударған. Бұл қаржының бір бөлігіне Түркия және Қытай елдеріне 50 жасанды тыныс алу аппаратына тапсырыс беріліп, таяу арада өңірге жеткізілмек.

Nur Otan партиясы облыстық филиалы төрағасының бірінші орынбасары Бейсенбай Тәжібаев бұл жобалар өңірдегі жас еріктілерді игі іске жұмылдырып отырғанын жеткізді. «Жоба аясындағы жұмыстар Қоғамдық денсаулық басқармасымен де бірлесіп атқарылады. Бұл игі бастамаға партия өкілдері, мәслихат депутаттары қолдау көрсетуде. Пандемиямен күресте, мұқтаж отбасыларға көмектесуде аталған жобалар тиімділігін көрсетеді деп сенемін. Осы қиын кезеңде елге көмектесуге барша азаматтарды атсалысуға шақырамыз», дейді Б.Тәжібаев. Ал қиын сәтте қажетті дәрі-дәрмекке қол жеткізген тұрғындар қайырымды жандарға шексіз алғыстарын айтуда.

Өңірде тұрғындарды қажетті дәрі-дәрмекпен қамтамасыз ету мәселесі де біртіндеп шешімін тауып, жағдай тұрақтанып келеді. Осы орайда облысқа 5 млн-ға жуық дәрілік препарат келген. Пандемиямен күрес үшін облыс бюджетінен қаражат бөлініп, Өзбекстан елінен жеткен кезекті партияның ішінде халыққа ең қажет түрлері бар. Атап айтқанда, амброксол, левофлаксацин, аминофиллин, азитромицин, цефтриаксон, парацетамол, метранидазол, дексаметазон, эуфиллин секілді пневмония және коронавирусқа қарсы препараттар әкелінген. Осынау қажетті дәрі-дәрмектің жартысы өңірдегі аудан-қала ауруханаларына таратылса, жартысы әкімдіктермен меморандумға отырған 153 дәріханаға шекті бағамен жөнелтіледі.

Айта кетейік, бұған дейін облыс әкімдігі халықты қажетті дәрілік заттармен қамтамасыз ету мақсатында жергілікті бюджет есебінен 500 млн теңге қаражат бөлген.

Түркістан облысы