Көптің көмегі көңілге демеу

Қоғам • 27 Шілде, 2020

Көптің көмегі көңілге демеу

17 рет көрсетілді

Бүгінде әлемді әбігерге салып отырған коронавирус індетімен күрес кезінде жамбылдық азаматтар да белсенділік танытуда. Жергілікті кәсіпкерлердің және өзге де қайырымды жандардың атсалысуымен қазіргі кезде Тараз қаласындағы №5 емханаға дәрі-дәрмектер мен медициналық бұйымдардың ірі партиясы жеткізілген.

Хамит ЕСАМАН

Оның ішінде дене қызуын түсіретін дәрілер, қабынуға қарсы дәрі-дәрмектер, антибиотиктер және бір реттік шприцтер бар. Жалпы құны 27 млн теңгені құрайды. Аталған медициналық бұйымдар тізімге сәйкес облыс бойынша көмекке мұқтаж жандарға таратылуда.

«Облыс әкімі Бердібек Сапарбаев кәсіпкерлермен арнайы кездесіп, жерлестеріміз үшін қолдан келетін барлық мүмкіндікті жасауға шақырды. Кейінірек облыстық денсаулық сақтау басқармасынан азаматтар қоңырау шалып, инфекциялық аурухана үшін оттегі түтіктерін сатып алуға көмектесуімді сұрады. Өзім жақсы танитын біраз кәсіпкерлерге хабарласып, осы ұсынысты жеткіздім. Олар мені бірден қолдады. Сөйтіп бәріміз 11 концентратор аппаратын алуға қаражат жинадық», дейді «Альтаис Групп» ЖШС бас директоры Әлімбек Жұмабаев.

Бұдан бөлек, қажетті мөлшерде дәрі-дәрмек сатып алу үшін қайырымды жандардың қолдауымен 48 млн теңгеге жуық қаражат жиналыпты. Жалпы алғанда, жамбылдық 20 ірі компанияның басшылары қауіпті індетпен күреске 70 млн теңге көлемінде қаржы бөлген.

«Тараз» әлеуметтік-кәсіпкерлік корпорациясы» мекемесінің басқарма төрағасы Олжас Қаржауовтың айтуынша, аталған корпорация үйлестіруші ретінде Шымкент қаласындағы «Зерде» медициналық қоймасымен заттарды жеткізіп беру бойынша келіссөз жүргізген. Сондай-ақ олар тауарларды тасымалдауды барынша қамтамасыз етіпті. Жамбылдық кәсіпкерлер мен қоғам белсенділерінің, жалпы қайырымды жандардың жедел жұмылып, жүйелі әрекет етуінің нәтижесінде көптеген науқастың лайықты деңгейде ем алуына жағдай жасалып отыр. Бұл орайда Жамбыл облысы әкімінің бірінші орынбасары Бекболат Орынбеков қауіпті індетпен күресте күш біріктірудің маңыздылығын айта келіп, көптің көмегі талайдың көңіліне демеу болып отырғанын жеткізді.

Жамбыл облысы