Ұйымдастырушылардың айтуынша, әр себетке күріш, ұн, макарон, жарма, жұмыртқа, өсімдік майы, қант және жеке қорғаныш құралдары салынған. Олардың дені жергілікті кәсіпорындарда шығарылған азық-түлік өнімдері.
Қайырымдылық шарасы әуелде ел астанасы Нұр-Сұлтанда басталып, кейін өзге аймақтардағы кәсіпкерлер іліп әкеткен. "Біразы ақшалай көмек көрсетіп жатыр. Ал жергілікті кәсіпорындар өздері шығаратын өнімдерімен бөлісуде. Бұлардың бәрі ең бірінші кезекте қажет әлеуметтік маңызы бар азық-түлік өнімдері. Сондай-ақ, кейбір кәсіпорындар лимонад, йогурт, түрлі тәтті тағамдарын әкеліп тапсыруда", - деді облыстық кәсіпкерлер палатасы директорының орынбасары Геннадий Кукоба.
Шараға жеңіл өнеркәсіппен айналысатын ірі кәсіпорындар да атсалысуда. Мәселен, жиналған азық-түлік қоры мен қорғаныш құралдары жұртқа таратылғанша "Большевичка" тігін фабрикасының қоймасында сақталады. Аталмыш фабрика акцияны ұйымдастырушыларға арнайы көлік бөліп, 2 мыңдай медициналық маска берген. "Пандемия біздің кәсіпорынға да оңай тиіп жатқан жоқ. Вирус жұқтырған жұмысшылар бар. Соған қарамастан, өндірісті тоқтатпауға тырысып жатырмыз. Қазір қорғаныш құралдарына тапсырыс берушілер көп. Ал бізге мата жеткізіп берушілер кешігіп қалып жатыр. Матасыз тапсырыс орындалмайды. Сондықтан кезек күткендерге жағдайды түсіндіріп, күте тұруын сұраймыз. Әйтеуір тапсырыс берушілер де жағдайды түсініп жатыр", - дейді тігін фабрикасының басшысы Әрсен Жетпісбаев.
Қайырымдылық марафонына ірі кәсіпорындармен қатар, шағын бизнеспен айналысатын жеке кәсіпкерлер де шамасы келгенше өз үлестерін қосуда. Жиналған азық-түлік себеттерінің әр қайсысының салмағы 30 келінің ар жақ-бер жағында. Әлеуметтік себеттерді әр отбасына еріктілер жеткізіп береді.́
Қостанай облысы
