Бұдан бөлек, Мемлекеттік қызмет істері Агенттігінің Түркістан облысы бойынша департаменті алты айда мемлекеттік қызмет көрсету заңнамасын сақтау мәселесі бойынша 17 тексеру жүргізіп, нәтижесінде 208 заңбұзушылық анықталған. Оның басым бөлігі жер қатынастары (73%), халықты әлеуметтік қорғау (12%), сәулет және құрылыс (3%), білім (3%) салаларында орын алған. Бұл ретте, Департамент ұсынысымен заңбұзушылықтарға жол берген мемлекеттік органдардың 10 қызметкері түрлі тәртіптік жауапкершілікке тартылған. Өңірлік коммуникациялар қызметінде өткен брифингте Департамент басшысы, Әдеп жөніндегі кеңес төрағасы Айбек Шілманов осындай деректерді келтіре келе, мемлекеттік қызметшілердің жалпы конкурстарға қатысу тәртібі жеңілдетілгенін айтып өтті.
Қазір барлық мемлекеттік органдардың қызметкерлері арасында өтетін ішкі конкурс жалпы конкурспен біріктіріліп, мемлекеттік қызметке орналасу бойынша конкурс өткізу мерзімі 30%-ға қысқартылды. Аталған жаңа бастама бос орындарды уақытты үнемді пайдалану арқылы жылдам түрде толтыруға өз септігін тигізеді.
"Қазіргі таңда Түркістан облысында 6583 мемлекеттік қызметші жұмыс істесе, бос лауазымдар саны – 440. Мемлекеттік қызметшілер енді конкурстарға жалпы негізде емес, ішкі конкурсқа ұқсас жеңілдетілген тәртіп бойынша қатысады. Бұл ретте, конкурссыз тағайындалатын мемлекеттік орган бірінші басшыларының көмекшілері, кеңесшілері, баспасөз хатшылары тестілеуден жəне жеке қасиеттерін бағалаудан өткен жағдайда осы лауазымға орналасқаннан кейін бір жыл өткен соң ғана ішкі конкурсқа қатысуға жіберіледі", - деді Айбек Ақбергенұлы.
Брифинг барысында департамент басшысы ауылдық округтердің әкімдеріне өкілеттік мерзімі аяқталғаннан кейін бір жыл ішінде кез-келген "Б" корпусы лауазымдарына конкурстық іріктеусіз орналасу құқығы берілгендігін айтты. "А" корпусының кадр резервін қалыптастыру және оған іріктеу тәртіптері алынып тасталды. Сондай-ақ, ауылдық округтердің әкімдері аппараттарында жұмыс істеуге ниет білдірген азаматтарды әлеуметтік қолдау мақсатында оларды "Дипломмен ауылға" бағдарламасына енгізу көзделуде.
Түркістан облысы
