Татарстан дәрігерлері Жамбыл медицинасын жоғары бағалады

Аймақтар • 30 Шілде, 2020

Татарстан дәрігерлері Жамбыл медицинасын жоғары бағалады

92 рет көрсетілді

Жуырда тәжірибе алмасу мақсатында Әулиеата өңіріне келген Татарстан дәрігерлері Жамбыл облысының әкімі Бердібек Сапарбаевпен кездесті. Кездесу барысында Татарстан дәрігерлері Жамбыл облысының денсаулық сақтау жүйесінің даму деңгейіне жоғары баға берді. Өз кезегінде Бердібек Сапарбаев білікті мамандарға шақыруды қабыл алғаны үшін алғыс білдірді. Сонымен қатар, әлемдегі күрделі эпидемиялық ахуал жағдайында бауырлас көрші мемлекеттердің қолдауы аса маңызды екенін атап өтті, - деп жазады Egemen.kz

Хамит ЕСАМАН

"Сіздердің республикаларыңыздың басшылығымен бұрыннан келе жатқан достық байланысымыз бар. Мен бір кездері басшылық еткен Шығыс Қазақстан облысының Семей қаласында татар этносының өкілдері көптеп орналасқан. Ол жақта жыл сайын сабантой мерекесі өткізіліп, әлемнің түкпір-түкпірінен татар ұлтының өкілдері шақырылады. Бірде оған Татарстанның бұрынғы президенті Минтимер Шаймиев те қатысқан болатын. Сіздердің республикаларыңыздың қазіргі басшылығымен де серіктестік, сонымен бірге достық қарым-қатынас сақтап қалғанымызға қуаныштымын", деді Бердібек Сапарбаев. Сондай-ақ, әкім бүгінде Ресей Федерациясы, әсіресе Татарстан коронавирусқа қарсы күресте жоғары нәтижелерге қол жеткізе білгенін, бұл ең әуелі дәрігерлердің ерен еңбегінің жемісі екенін атап өтті.

"Біз бұған дейін Қазақстанда болған емеспіз. Нұр-Сұлтан, Алматы, Шымкент, Қарағанды сияқты қалалар туралы естігенбіз. Шынын айту керек, Жамбыл облысы медицинасының деңгейі ауылдық көрсеткішпен бірдей деп ойлағанбыз. Бірақ біз қателесіппіз. Сіздердің дәрігерлеріңіз коронавируспен ауыратын науқастарды емдеуде қолданатын медициналық көмек үлгілері, емдеу хаттамалары, тіпті ауылдық жердегі медициналық көмек көрсету моделдеріңіз іс жүзінде Ресейдегіден еш айырмашылығы жоқ. Сіздерден де үйренетін нәрсеміздің бар екенін мойындаймыз. Өкінішке қарай, бүгінде әлемнің бірде-бір елінде коронавирусты емдеудің нақты хаттамасы жоқ. Сондықтан біздің кездесуіміз тәжірибе, пікір алмасуға негізделген. Біз қазақстандық мамандармен бірге коронавируспен күреске үлесқосамыз деп үміттенеміз", дейді топ жетекшісі, Татарстан Республикасы Орталық округі басшысының коронавирустық инфекциясы бар науқастарға реанимациялық көмек көрсету жөніндегі орынбасары Александр Ванюшин. Өз сөзінде Бердібек Сапарбаев бүгінде өңірде жағдайдың тұрақтанғанын жеткізді. «Облыста коронавируспен ауыратындардың саны 3391 адамды құрайды. Қазіргі кезде олардың жартысына жуығы емделіп шықты. Инфекциялық және провизорлық стационарлар ашылып, ауруханалар мен дәріханаларды дәрі-дәрмекпен қамтамасыз ету мәселесі шешілді. Дегенмен, медициналық жабдықтармен қамтуда мәселе бар. Әсіресе өкпені жасанды желдету аппараттарының жетіспеушілігі байқалады. Бұл мәселені шешуге біз кәсіпкерлерді, ірі компанияларды тарттық. Тамыз айында барлық медициналық мекемелерді өкпені жасанды желдету аппараттарымен толық қамтамасыз ете аламыз деп ойлаймын. Жақын арада облыстың барлық аудандары үшін 10 компьютерлік томограф сатып алу жоспарланып отыр. Кадр тапшылығы мәселесін шешу үшін зейнет демалысындағы дәрігерлер мен медициналық жоғары оқу орындарының түлектерін де жұмысқа шақырттық. Бұл жұмысқа шамамен 300-ге жуық адам тартылды», деді Бердібек Сапарбаев. Сонымен қатар, ол өңірдегі және жалпы республикадағы жағдайдың тұрақтанғанына қарамастан, әлі оны жақсы деп бағалауға болмайтынын айтты. Сондықтан Қазақстан Президентінің карантинді тағы екі аптаға ұзарту, содан кейін барып біртіндеп шектеу шараларын жеңілдету туралы шешімінің дұрыс екенін атап өтті.

Кездесу соңында өздерінің Қазақстанға келуіне мүмкіндік жасағаны үшін Қазақстан Үкіметіне және Жамбыл облысының басшылығына ризашылықтарын білдірді. Сондай-ақ, жамбылдық дәрігерлерді Татарстанға іссапармен келуге шақырды.

Жамбыл облысы