Құрбан айт мейрамы биыл пандемия жағдайында ұйымдастырылып отыр, нақтылай айтқанда қалыптасқан ахуалға байланысты Қазақстан мұсылмандары діни басқармасының пәтуасы бойынша мешіттерде Айт намазы оқылған жоқ әрі осы мерекеге қатысты дәстүрлі жөн-жоралғыларға, діни рәсімдерге ислам шарттарын сақтай отырып аз-кем өзгерістер мен шектеулер енгізілді. Мұның бәрі халық денсаулығын сақтау, қорғау мақсатында қолға алынғандықтан, халқымыз ҚМДБ шешімдеріне қолдау білдірді.
Айтулы мерекеде Қазақстан мұсылмандары риясыз пейілмен, Жаратқанға деген биік сеніммен Алла жолында құрбан шалып, ізгілік пен қайырымдылықтың, қанағат пен сабырлықтың озық үлгісін көрсетіп, көмекке мұқтаж жандарға қол ұшын созып, олардың бата-тілегін алып, алғысына бөленуде.
Сан ғасырлардан бері Ислам дінін рухани тірегіне, темірқазығына айналдырған халқымыз Құрбан айтқа деген ықылас-ниетін мерекеге айрықша дайындалуымен де білдірді. Ұлық мейрам кезінде салт-санаға сіңіп, дәстүр ретінде қалыптасқан, ыждаһаттылықпен орындалатын құлшылықтар мен діни рәсімдер ізгі ниетпен атқарылуда. Бұл өз кезегінде Құрбан айттың, оның аясында орындалатын дәстүрлі рәсімдердің халқымыздың рухани болмысының ажырамас бір бөлігі болып кеткенін көрсетсе керек.
Құрбан айт – мұсылмандардың Аллаға деген сүйіспеншілігі айқын көрінетін мейрам. Бұл мерекеде Алла разылығы үшін құрбандыққа мал шалынады. Қасиетті Құранда: «Ұмытпаңдар, олардың еті де, қаны да ешқашан Аллаға жетпейді. Оған жететін нәрсе – жүректеріңізге ұялаған тақуалықтарың (шынайы ниеттерің)» («Хаж» сүресі, 37-аят), – делінген. Бұл жерде Алла жолында жақсылық жасауға ниеттенген адам құрбандық шалу амалын риясыз оймен іске асырады.
Өкінішке қарай, Құрбан айтта пандемия жағдайына байланысты жамағатпен құлшылық жасай алмадық. Өйткені Алланың аманаты саналатын халық денсаулығын сақтау – мұсылмандық басты міндет болғандықтан осылай болды.
Бүгінде бүкіл әлем індет аранының аузында тұр. Бұл ауыртпалық біздің елімізге де оңай тиіп тұрған жоқ. Сондықтан аса мейірімді, ерекше қамқор Алла Тағаладан осы сынақтың тезірек аяқталуын, оның соңы жақсылыққа ұласуын тілейміз.
Алла Тағала індеттің бетін қайтарып, оның ізін де қалдырмай, жақсылығы мен игілігін көрсеткей. Аты жаман дерттен көз жұмғандарды панасына алып, сырқаттанып жатқандарға шипасын бергей. Еңселі еліміз аман, ынтымағы жарасқан халқымыз тыныш болсын. Құрбан айтта жасаған барлық құлшылық амалымыз Алланың тарапынан қабыл болғай.
