Кви-ің жібиін деді ме?

Өңір басшысының сөзіне қарағанда, соңғы аптадан бері жедел жәрдем шақыруларының саны айтарлықтай кеміген көрі­не­ді. Мысалы, маусымның соңы және шілде айының басын­да­ғы қауырт кезеңде жіті рес­пира­торлық вирустық инфекция және пневмония белгілері бар науқастар үшін шақырулар саны 2,5 мыңға дейін жетсе, соңғы күндері бар-жоғы 320 шақы­ру тіркеліп, ауруханаға жат­қызыл­ған­дардың саны 100 адамнан аз болған.

Ал жалпы жағдай туралы айтар болсақ, облыстағы прови­зорл­ық және инфекциялық гос­пи­­тальдардағы барлығы 4 427 төсектік орынның 1 746-сы ғана бос емес екен. Яғни қазіргі уақыт­та осынша пациент ем-дом алып жатыр, қалған орындар бос. Инфекциялық   стацио­нар­лар­дағы жүктеме үлесі 38%-ды құраса, прови­зорлықтағы көр­сет­кіш 42%-ға тең көрінеді.

Коронавирус күшейіп, өзінің шарықтау шегіне жеткен кезде облыстың қалаларындағы кейбір қонақүйлері, жоғары оқу орындарының жатақханалары госпитальға айналдырылған бо­­латын. Енді олар жағдайға бай­­ланысты консервация­ла­на­ды. Дегенмен індеттің екінші толқыны бола қалған жағ­дай­да науқастарды орналас­ты­ру үшін материалдық-тех­ни­ка­­лық жабдықтар сол жерде қал­ды­ры­ла­ды.

­Қазіргі таңда облыста коро­на­вирус инфекциясының қай­та өршу ықтималдығына даяр­лық жұмыстары басталып кеткен. Өңір басшысының өзі ­эпи­де­миялық ахуалдың жақ­сар­уы босаңсуға еш негіз бер­мей­ті­нін осы аптада болған аппарат жиы­нында атап өтті.

– Жалпы, аурушаңдық тұ­рақ­ты түрде төмендеуде деп айту­ға негіз бар. Госпитальдарда бос орындар көп. Динамика оң, оны әрі қарай да сақтау керек. Ден­саулық сақтау жүйесін күз­гі-қысқы кезеңдегі жұмысқа даяр­­лау маңызды міндеттің бірі болмақ. КВИ-дің екінші толқыны болуы мүмкін деген болжам бар. Біз тұрғындарға барлық қажетті меди­циналық көмекті көрсетуге барын­ша дайын болуымыз керек, – деді Жеңіс Қасымбек.

Ал облыстық денсаулық сақ­тау басқармасының басшысы Ержан Нұрлыбаев қазіргі жағ­дайға шолу жасай келіп, мынадай деректерді алға тартты: «Бүгінгі таңда Қарағанды облысында індетті жұқтырудың 8 058 оқиғасы тіркелген. Ауру­дың өсуі 1,5%-ды құрайды. Өкі­ніш­ке қарай, 81 адам індеттен қайтыс болды, 4 926 науқас жазылып шықты. Соңғы екі апта­да­ғы талдау эпиджағдайдың жақ­сарғанын, аурушаңдық тө­мен­­дегенін көрсетеді. Төсек қо­ры­ның жүктемесі де азайды. Инфек­циялық кереуеттер 47%-ға, провизорлық кереуеттер 50% жүктемемен жұмыс істеуде».

Айрықша атап өтетін жайт, облыста дәрі-дәрмекпен қам­та­масыз етудің түбегейлі жақ­сар­ғаны байқалады. Стацио­нар­лар­да қажетті препараттардың жеткілікті қоры бар екен. Облыс емха­наларына пневмониядан үй жағдайында емделетін науқас­тар­ды қамтамасыз ету үшін антибиотиктер түскен. Сондай-ақ дәріхана желілерінде де тап­шылық мәселесі шешілген деп се­німмен айтуға болады, дейді ден­саулық сақтау басқар­ма­сы­ның жауапты мамандары.

Соңғы аптада облыста 1 300 оттегі концентраторы, 90 дана өкпе­ні жасанды жеделдету аппараты, 645 пульсоксиметр және 25 заманауи рентген-аппарат алынған. Медициналық газ беру­дің сегіз жүйесін орнату жоспарда бар. Күзгі-қысқы кезеңде тағы 1 500 пульсоксиметр, 500 оттегі концентраторы сатып алынбақ. Жалпы, қыркүйек айын­да рес­пуб­ликалық бюджет есе­бінен Қарағанды облысына 302 дана өкпені жасанды желдету аппаратын сатып алуға қаражат бөлінеді деген жағымды жаңалық бар.

Сондай-ақ компьютерлік томографтар мен цифрлы рентген-аппараттардың саны артады, ПТР-диагностика желісін кеңей­ту де іске асырылмақ. Ал қыс айларының басында тағы бес компьютерлік томограф пайда­ла­ну­ға берілмек.

Осыдан біраз бұрын облыс бойынша медицина кадрларының жетіспеушілігі туралы әңгіме қозғал­ған болатын. Қазір бұл мәсе­ленің де шешімі табылғанға ұқсайды: биыл медициналық жо­ғары оқу орындарының 360 түле­гін жұмысқа орналастыру жоспарға алыныпты. Облыстың қалалары мен аудандарында олар­ды баспанамен қамтамасыз ету ісі ұйымдастырылмақ.

Биылғы қыркүйек айында Жезқазған қаласында 300 төсек­тік модульдік аурухананың құры­лы­сы басталады. Сондай-ақ Шахтинск қаласындағы жұқпалы аурулар бөлімшесін жөндеу жұмыстары жалғасуда, Балқаш және Жезқазғандағы жұқпалы ауру­лар ауруханаларын және Темір­­тау­дағы провизорлық бө­лім­­шені жөндеу үшін жобалық-сметалық құжаттамалардың мем­ле­кеттік сараптамасы аяқталуға жақын.

Осы орайда облыста «Дәрі­гер­лерге мың алғыс!» акция­сының күш ала бастағанын айт­пай кетуге тағы болмайды. Мыса­лы, облыстағы Ақтоғай ауда­нының белсенді азаматтары оттегі концентраторларын, пульсоксиметрлер, Бобров аппараттарын және басқа да жабдықтарды сатып алуға 2,5 млн теңгеге жуық қаражат жинаған. Сондай-ақ Шет ауданындағы Ақадыр кентінің ауруханасына жергілікті кәсіпкер Әсет Дандыбаевтың «Нива» маркалы автокөлік сыйлағаны да қалталы азаматтардың көбіне үлгі болуға тұрарлық іс. Шарапатты шаруаға Қарқаралы ауданының тумалары да өздерінің қомақты үлестерін қосты. Кәсіпкерлер Нұрлан Мұсипов пен Ермұрат Зейнешев, Қарағандыдағы «Таза­лық Эксперт» ЖШС-нің бас­шылары өз қаражаттарына сегіз оттегі концентраторын сатып алып, Қарқаралы қаласы мен Егін­ді­бұлақ кентінің аурухана­ла­рына жеткізді. Ал мұның алдында «Темірзат» ЖШС-нің басшысы Айдын Мезгілбаев оттегі концентраторын Қарқаралы ауданының орталық ауруханасына тарту еткен болатын.

Мұндай сипаттағы қайы­рым­ды істер Сәтбаев қаласында да көрініс тапқан. Мұнда күн сайын 700-ден астам ерікті мұқтаж жандарға көмек көрсетеді. Ка­ран­­­тин кезінде еріктілер онда­ған акция өткізіп, мыңдаған қала тұрғындарына көмектесті. Жастар 100 жалғыз басты қарт адамға 200 қап парацетамол мен аспи­рин дәрілерін жеткізуге қол ұшын берген. Жергілікті кәсіп­керлер де игі іс-шарадан шет қалмады. Олар орталық ауру­хананың жұқпалы аурулар бөліміне 113 дана төсек жаб­ды­ғын, 50 сүлгі, 1 мың маска, 250 ПЧК комбинезоны, 18 оттегі концентраторы, 25 пульсоксиметр және басқа да қажетті заттарды тарту етті.

Қарағанды облысының қала­лары мен аудандарында кеңі­нен өріс алған мұндай қайы­рым­дылық акциялары алда-жалда коронавирустың кезекті тол­қы­ны қауіп төндірер болса, ел аман­ды­ғын сақтау жолындағы алынбас қамал­дың кетігін тапқан бір-бір кірпіші болары сөзсіз.

 

Қарағанды облысы