Бүгін біз аз ғана уақыт ішінде тек Нұр-Сұлтан қаласына ғана емес, Башқұртстанда да танымал болған елордалық «Ақбозат» башқұрт этно-мәдени орталығы төрағасының орынбасары Закир Бикмухаметов туралы аз-кем сөз қозғамақпыз. Елордалық Қазақстан халқы Ассамблеясына Закирдың келгеніне көп уақыт болған жоқ. Осы аралықта ол талай мәдени-бұқаралық іс-шараларға белсене қатысып жүрген жастардың біріне айналды.
Қазіргі таңда біз үшін тек қана денсаулығымыз ғана емес, сонымен қатар рухымыз сыналып жатыр. Осы орайда халық денсаулығына алаңдаған жастар дәрігерлерге, науқастарға көмектесуді азаматтық парызы санады. Нақтылай айтқанда жастар өкілдерін науқастар мен дәрігерлерге көмектесу үшін ауруханаға ерікті санитар болып баруды жөн деп тапты. Міне, осындай шешім қабылдаған жастардың бірі – Закир.
Закирдің әкесі қатты ауырып қалды. Ол әкесін ауруханаға жатқызғаннан кейін ауыр сәттерде ең қымбат адамның жанында болу туралы шешім қабылдады. Содан ол медициналық тексеруден өтіп, Нұр-Сұлтан қаласындағы 1-ші қалалық аурухананың ерікті санитары болып жұмыс істей бастады.
Бірақ, үлкен өкінішке қарай, індет Закирдің әкесін де айналып өтпеді...
Закир осындай үлкен қайғыға мойымастан ауруханадағы жұмысын тастамай, ерікті түрде санитарлық қызметін жалғастыра берді. Ол моральдық жағынан қиын жағдайда жүрсе де науқастарды күту бойынша күнделікті жұмысына барлық уақытын арнады. Егер бір науқастың жағдайы түзеліп, ауруы жеңілдесе, Закир үшін еңбегінің еш болмағаны.
Осындай күрделі жағдайда волонтер болу шешімін ерлік, ізгілік және парасаттылықтың үлгісі деп айтуға болар. Біздің қарапайым жас замандасымыз – Закир Бикмухаметов айналасына осындай жарқын үлгі көрсете білді.
Елордалық Қазақстан халқы Ассамблеясының барлық игі істерінің белсенді қатысушысы З. Бикмухаметов қазіргідей қиын кезеңде үрейге бой алдырмай, сабырлылық таныту, тәртіпке бағыну өте маңызды деп есептейді.
– Менің замандастарым осындай ауқымдағы үлкен қауіпке бұрын-сонды тап болған жоқ. Біздің халқымызға бұл сын-қатерді түсіну және қабылдау маңызды. Сол кезде біз қаншама қиындықтарды бастан өткеріп, оларды жеңе білген ата-бабаларымыздың жеңісті де жемісті жолын сәтімен жалғастыра білген боламыз. Қиын уақытта тұрақтылықты сақтау керек, ал тәртіпке бағыну өте маңызды. Үрейге бой алдырмау қажет, алайда босаңсуға болмайды, – дейді.
Закирдың белсенді іс-әрекеті жастар үшін қашанда үлгі деп нық айта аламыз. Оның таңдаған жолы – еңбек. Ендеше еріктінің қарапайым еңбек жолы жастар үшін үлгі-өнеге болуы керек.
