Атап айтқанда, наурыз айынан бері елімізге белгілі ғалымдар мен тарихшылар, археологтар және реставраторлардың қатысуымен тарихи-танымдық бағытта онлайн дәрістер, кездесулер, көрмелер, «Бір жәдігер – бір тарих» атты бейнешолу, киелі орындарға «Экскурсия сағаты» сынды бейнесапар т.б. шараларды үздіксіз атқарып келеді.
Сонымен қатар төл тарихымызда орны бар тұлғалар есімін ұрпаққа жеткізу мақсатында – қорық-музей ұжымы жасөспірімдерге арнап «Түркістан және тарихи орындар мен тұлғалар» атты қылқалам шеберлерінің көрмесі мен шеберлік сабағын да ұйымдастырған болатын.
Жоғарыдағы келелі істердің жалғасы ретінде қорық-музей ұжымы оқушылардың жазғы демалысын тиімді пайдаланып, оларға аңыз-әңгімелер мен тарихи деректерді насихаттау, патриоттық сезімге баулу, тарихи орындар мен тұлғалар жайлы тереңірек танып-білуге шақыру мақсатында аңыз-әңгімелер топтамасын қолға алды.
Атап айтқанда, мекеме өз күшімен жинақтаған «100 аңыз» кітабындағы аңыз-әңгімелерді: Қожа Ахмет Ясауидің балалық шағы, ұстаздары мен шәкірттері, өмірлік жолы мен өнегесі, тарихи орындар мен тұлғалар сияқты тақырыптарға бөліп, бұл атауларды бейне көрсетілім, анимация, деректі фильм, графикалық сурет үлгілері сияқты тәсілде оқушыларға ұсынып отыр. Бұл аңыз-әңгімелерді қорық-музейдің фейсбук парақшасы және ютуб пен ресми сайты арқылы тамашалауға болады.
