Жоба бойынша аймаққа елімізге белгілі ғалымдарды шақырып, облыс тұрғындарына Абай Құнанбайұлы, Шоқан Уәлиханов, Әбу Насыр Әл-Фараби сынды ұлы тұлғалардың өмірі мен шығармашылығы туралы дәрістер ұйымдастырылу керек болатын. Ашық дәрістерді қалаған тыңдарман қатыса алатындай ашық алаңда өткізу көзделген. Осындай мақсатпен басқарма шақыртуымен наурыз айында белгілі ғалым Ғарифолла Есім Қостанайға келіп, хәкім Абайдың даналық дүниетанымы туралы дәріс оқуы тиіс еді. Бірақ игі бастамаға әлемді жайлаған індет кедергі болып, пандемия өз пәрменін жүргізе бастады. Аймақта шектеу шаралары жарияланып, адам көп шоғырланатын шараларды өткізуге тыйым салынды. Осылайша, ғалымның Қостанайға іссапары амалсыз кейінге шегерілді.
Карантин уақыты ұзарып, елдегі санитарлық сақтық шаралары аяққа тұсау сала берген соң, ішкі саясат басқармасы абайтанушымен кездесуді биыл елімізде тұңғыш рет аталып өтіп жатқан Абай күніне орайластырыпты. Басқарма өкілдері ғалымның "Хәкім Абай және қазіргі заман" деп аталатын видеодәрісін 3 тамыз күні Нұр-Сұлтан қаласында бейнетаспаға түсіріп алған. Ғалымның абайтануға қатысты тың ойларға толы бұл дәрісі бүгін, яғни 10 тамыз – Абай күні мерекесіне орай сағат 10:00-де жергілікті "Qostanai" телеарнасының эфирі арқылы арқылы көрсетілді.
Қостанай облысы
