Жалпы, аудандағы көпбалалы отбасыларды барлық жағынан қолдау жұмысы жүйелі түрде ұйымдастырылуда. Әсіресе, карантин кезінде көмекке мұқтаж адамдарға азық-түлік себеттері мен медициналық керек-жарақ түрлерін тегін жеткізіп беру жолға қойылған. Осы игі іске ауданның тәртіп сақшылары да үнемі үлес қосып келеді екен.
"Қайырым жасау үшін үлкен жүрек пен жанашыр ниет керек қой. Біз де осы ізгі мақсатқа жұмылып отырмыз. Көпбалалы отбасына көмек көрсету туралы бастаманы полиция басқармасының жеке құрамы бір ауыздан қолдады. Қызметкерлер Орманбаевтардың үйіне барып, отбасына медициналық бетперде мен қолғаптар, азық-түлік, сондай-ақ үйдегі үш оқушыға жаңа оқу жылына арнап барлық кеңсе құралдарын табыстады", - дейді Балқаш аудандық полиция басқармасы басшысының міндетін атқарушы, подполковнигі Нұргелді Абиров.
Айтпақшы, балқаштық полицейлер карантин кезіндегі санитарлық ережелердің сақталуын қатаң қадағалап әрі қоғамдық тәртіптің бұзылмауы үшін аянбай еңбек етіп отыр. Мұның сыртында тұрғындарға жұқпалы індеттің қауіп-қатері жайлы түсіндіріп, жолаушыларға тегін бетперде де таратып беруде.
"Жұқпалы індет кезінде әлеуметтік жауапкершіліктің жоғары болуына бәріміз бір кіәсідей үлес қосуымыз керек. Полицей үшін тәртіптің сақталуы қаншалықты маңызды болса, адамдардың денсаулығына бей-жай қарамауы да соншалық жауапты міндетке айналды. Бұл жерде біз карантин ережесін бұзғандарға шара қолдаудан бөлек, әр тұрғынға індет қауіпі жайында түсіндіріп отырмыз. Елді мекен тұрғындарына тегін бетперде таратамыз. Аудан полицейлерінің күшімен, 1500 дана медициналық маска сатып алып, тұрғындарға табыстадық", - дейді әкімшілік полиция бөлімінің бастығы, подполковник Балбек Лепесбаев.
