Экономика • 11 Тамыз, 2020

Шарапаты мол «Шет-Көмек»

391 рет
көрсетілді
4 мин
оқу үшін

Бүгінде шаруаның несие қаржысы болмаса, күні қараң. Сол себепті де несие беретін мекемеге жіпсіз байланған. Дегенмен, елімізде бұл мәселенің шешімі табылған және біраз жылдан бері жемісті жұмыс істеп келеді. Қарағанды облысындағы «Шет-Көмек» несие серіктестігінің 15 жылдан аса уақыт ауыл шаруашылығында адал кәсібімен нәпақасын тауып жүрген кәсіпкерлерге көрсетіп келе жатқан көмегін ерекше атап өтуге болады.

Шарапаты мол «Шет-Көмек»

«Шет-Көмек» несие серіктес­тігі» ЖШС 2005 жылы құрылып, жұмыс істей бастады. Оның негізін аудан, облыс көлеміне таны­мал азамат Боранбай Жұм­кин қалаған еді. Әуел баста жар­ғылық капиталы 8,5 млн теңгені құраған серіктестіктің құрамына 23 шаруа қожалығы енді.

Бүгінгі күнде «Шет-Көмек» серіктестігі қанатын кеңге жайып, дамудың даңғыл жолына түскен. Қазір жарғылық капиталы 75 млн 848 мың теңгені құрайтын оның құрамында 200-ден астам шаруа қожалығы бар. Несие арнасы да едәуір артып, 1 млрд 592 млн 808 мың теңгені құрады.

Серіктестік құрылғаннан бас­тап бүгінге дейін Шет ауданы­ның 481 шаруа құрылымына жалпы сомасы 1 млрд 311 млн 373 853 теңге болатын несие берді.

Жалпы, серіктестік жұмысы­ның нәтижесі көп жағдайда несиенің белгіленген кесте бо­йынша дер кезінде қайтарылуы­мен есептеледі. Бұл бағытта «Шет-Көмектің» шоқтығы биік тұр. Астанадағы «Аграрлық несие корпорациясы» АҚ-ның ал­дында бүгінге дейін бере­шегі болған емес. Бұдан бөлек, серіктестік бюджет алдын­дағы тиісті төлемдерді де кешіктір­мей, тұрақты түрде төлеп тұра­ды. Жылына орташа есеппен ал­ғанда, 264 млн теңге мөл­шеріндегі қаржы бюджетке аударылып отырады.

Жасыратыны жоқ, қазіргі таңда екінші деңгейдегі банк­тер ауыл шаруа­шылығы саласында еңбек етіп жатқан кәсіп­керлерге несие беруге келгенде бірқатар себептерді сылтау етіп, құлықсыздық танытады. Ондағы айтатын басты себептерінің бірі – банктерді ауыл тұрғындарының кепілдік ретінде ұсынатын мал-мүлкі аса қызықтыра бермейді, оларға керегі – жылжымайтын мүлік. Ал «Шет-Көмек» болса, борышкерлердің мал-мүлкін қажетті құжаттармен рәсімдеп, нарықтағы бағасын шығарып, сол бойынша несие алуға барлық мүмкіндікті жасайды.

Енді нақты мысалға көше­­йік. Аудан орталығы Ақсу-Аюлы ауылындағы ұзақ жылдардан бері тұрақты жұмыс істеп келе жатқан «Жалаңтөс» шаруа қожалығының жетекшісі Маржан Жақыпбайқызы «Шет-Көмек» серіктестігінен тоғыз мәрте жалпы сомасы 63 млн 854 мың теңге болатын несие алып, жұмысына мақсатты түр­де пайдаланған. Дәл осындай мысалды аудандағы басқа да шаруа қожалықтары турасын­да айтуға болады. олардың қатарында «Нұржанат» (басшысы – Мейраш Касембеков), «Харекет» (Қуаныш Хантурин), «Бірназар» (Жомарт Жақаев), «Шалқар» (Шалқар Сағындық) және басқа шаруа қожалықтары серіктестіктің қаржылай қол­дауына ие болып, бүгінде нәти­жесін көріп келеді. 

Аталған фермерлер серіктес­тік құрылған кезден бастап онымен тығыз қарым-қатынас орнатып, бірнеше мәрте алған несиелерін шаруашылық­тары­ның материалдық-техникалық базасын жақсартуға және мал­дың басы мен өнімін арттыруға тиімді пайдаланып жүргенін айту ләзім.        

Қазір серіктестік құрамына аудандағы 7 кент пен 18 ауыл­дық округте жұмыс істеп тұр­ған шаруа қожалықтары мен жеке кәсіпкерлер кіреді. Бір айта кететін жайт, серіктестік құрыл­ғаннан 2019 жылдың 1 тамызына дейін 470 несие-займ беріліп, оның мөлшері 2 млрд 105 млн теңгені құрапты. Бұл орташа есеппен әр несие алушыға 4,5 млн теңге көлемінде қаржы берілді деген сөз.              

Құрылғанына 15 жыл болған «Шет-Көмек» несие серік­тесті­гінің өркен жайып дамуы­на серпін берген себептің бірін 2017 жылы ұйымның бас­шы­лығына іскер келіншек Ақжар­қын Иманбаеваның келуімен бай­ланыстыруға болады. Бүгін­ге дейін серіктестік ауыл шаруа­шылығы нысандарына несие беру қарқынын екі жарым есеге көбейтіп, 2018-2019 жылдары 100-ге тарта шаруа қожалығына 250 млн теңгенің көлемінде қаржы беруді қамтамасыз етті.

 

Қарағанды облысы,

Шет ауданы