Ибат Абдолұлы сонау 1925 жылы маусымның 10-ы күні Тайпақ өңірінде дүниеге келген екен. 1943 жылы майданға алынғанда небәрі 18-де болған. Үш айлық оқу-жаттығу жиынынан соң Украин, Беларусь майдандарына түсіп, Кенигсбергті, Варшава мен Берлинді алуға қатысқан. Жаяу әскер қатарында танкіге қарсы зеңбірек взводын басқарған Ибат Абдолов сол бір қиын күндерде «Ерлігі үшін» медалімен марапатталған екен. Соғыс аяқталып, елге келген соң саналы өмірін ұстаздық жолға арнаған ақсақал Теректі ауданы орталығындағы орта мектепті 20 жыл басқарыпты. «КСРО-ның еңбек сіңірген мұғалімі» атағы бар қария әлі тың.
– Бұрын адамның жеке басын анықтайтын төлқұжаттар ұзақ жылдарға берілетін. Бүгінде 10 жыл сайын ауысып тұрады. Бірақ біз ардагерлерді, мүгедектерді, тағы да басқа тиісті категорияға жататын азаматтарды әуреге салмай, үйіне барып та қызмет көрсетеміз. Жыл басынан бері біздің қызметкерлер осындай 2 мыңнан аса адамның үйіне барып қызмет көрсетті. Ал Ибат ағамызға жаңа куәлігін ерекше құрметпен барып табыс еттік, – дейді Азаматтарға арналған үкімет мемлекеттік корпорациясы Батыс Қазақстан облыстық филиалының PR-менеджері Мағзура Нұрмұханбетова.
Ибат ақсақал ғасыр жасаса да әлі тың. Жаңа куәлігін жасақтап, үйіне дейін әкеліп берген Халыққа қызмет көрсету орталығының қызметкерлеріне риза болып, ақ батасын жаудырды.
Батыс Қазақстан облысы
