Отырыста Денсаулық сақтау министрі Алексей Цой, Нұр-Сұлтан қаласының әкімі Алтай Көлгінов, Алматы қаласының әкімі Бақытжан Сағынтаев, Қарағанды облысының әкімі Жеңіс Қасымбек, Түркістан облысының әкімі Өмірзақ Шөкеев, Атырау облысының әкімі Махамбет Досмұхамбетов, «Атамекен» ҰКП басқарма төрағасы Абылай Мырзахметов және тағы басқалары елдегі санитарлық-эпидемиялық жағдайды баяндады, шектеу шараларын жеңілдету жөніндегі ұсыныс білдірді, өңірлер мен кәсіпкерлік субъектілерінің қызметті қайта бастауға дайындығы туралы айтты.
Жиында айтылғандай, карантин шаралары күшіне енген кезеңде эпидемиялық ахуал тұрақталып, медициналық ұйымдардың жүктемесі айтарлықтай төмендеді. Вирус таралуының тәуліктік өсімі 4%-дан 0,5%-ға дейін төмендеді. Сауығып шыққан адамдар саны 76%-ға жетті. Репродуктивтіліктің орташа көрсеткіші 0,78-ге дейін төмендеді, төсектік орындар жүктемесі 26% болды.
Отырыста айтылған мәселелерді қорыта келе мемлекеттік комиссия өңірлердің әкімдерінің ұсыныстарын, сондай-ақ Денсаулық сақтау министрлігі мен басқа да ведомстволардың ұстанымын ескере отырып, карантин шараларын кезең-кезеңімен алып тастау жоспарын бекітті және бірқатар шешім қабылдады.
Отырыс барысында Қазақстан Премьер-Министрі Асқар Мамин: «Маска режімі мен әлеуметтік қашықтық ‒ барлық адамдар үшін сақталуы тиіс міндетті санитарлық талаптар, бұл азаматтардың күнделікті өміріндегі ережелерге айналуы қажет. Бизнес субъектілерінің қызметін олар толық дайын болған жағдайда ғана қайта бастау қажет», – деді.
