Ойын басталмас бұрын бірқатар футбол мамандары Гвардиола баптайтын МС ұжымын үздік төрт команданың қатарына қосып қойған еді. Алайда, олардың бұл жолғы болжамын көбінесе қарымта шабуылдармен гол соққан «Лион» күл-паршасын шығарды.
«Лион» бірінші болып есеп ашты. Ойынның 24 минутында Корне айып алаңының сыртында сол аяқпен қиыстырып теуіп, командасын алға шығарды. 69 минутта МС сапынан Бельгия құрамасының тәжірибелі футболшысы Кевин Де Брюйне айып алаңының ішінде қақпаның оң жақ бұрышын дәл көздеп, есепті теңестірді. Ал ойынның 79 және 87 минуттарында француз шабуылшысы Мусса Дембеле дубль авторы атанып, бұл кездесуге нүкте қойды. Есеп – 3:1, «Лион» соңғы болып жартылай финалға жолдама алды.
Чемпиондар лигасының жартылай финалында (18 тамыз) «Лейпциг» – ПСЖ өзара мықтыны анықтаса, 19 тамызда «Лион» жартылай финалда кеше ғана «Барселонаны» 8:2 есебімен ойсырата жеңген азулы «Бавария» командасымен кездеседі.
Ойын статистикасы:
«Манчестер Сити» – «Лион» 1-3
Допты иелік ету – 67% – 33%; соққы – 19:7; дәл соққы – 8:6; айып соққы – 15:13; бұрыштама – 11:3; офсайд – 0:0; сары қағаз – 2:2; ойыншы алмастыру – 2:4.
«Манчестер Сити»: қақпашы – Эдерсон; қорғаушылар – Канселу, Лапорт, Гарсия, Уокер; жартылай қорғаушылар – Родри, Гюндоган, Фернандинью; шабуылшы – Стерлинг, Габриэл Жезус, Де Брюйне.
«Лион»: қақпашы – Лопеш; қорғаушылар – Денайер, Марсело, Маркал; жартылай қорғаушылар – Дюбуа, Какере, Бруно, Ауар, Корне; шабуылшылар – Депай, Экамби.
