Egemen.kz болжамы тағы да дәл келді. Жүрісінен жаңылмаған «Севилья» алтыншы рет Еуропа лигасының финалына шықты

Спорт • 17 Тамыз, 2020

Egemen.kz болжамы тағы да дәл келді. Жүрісінен жаңылмаған «Севилья» алтыншы рет Еуропа лигасының финалына шықты (Фоторепортаж)

58 рет көрсетілді

Бүгін түнде Еуропа лигасының жартылай финалының алғашқы ойындары өтті. Германияның Кёльн қаласында өткен матчта «Севилья» «Манчестер Юнайтедтен» 2:1 есебімен басым түсті.

Алмас МАНАП

Ойын басталмас бұрын біз «Севильяның» жеңіске жету жолдарына үңіліп, қандай жағдайда ғана олардың финалға шығуға мүмкіндігі бар екенін айтқан едік: «Соңғы 15 жылда Еуропа лигасының кубогын бес мәрте жеңіп алған «Севилья» бұл турнирде басты фовориттердің бірі. Алайда жартылай финалға шыққан командалардың барлығы «сен тұр, мен атайындар». Cондықтан бұл жолы да «нервиондықтар» үшін ауыр сынақ күтіп тұр. Неге ауыр сынақ? Себебі бұған дейін олар 1/8 финалда азулы «Рома» командасын 2:0 есебімен жеңді. Ширек финалда Англияның «Вулверхэмптон» футболшыларынан басым түсті. Енді міне олардың жолына МЮ кедергі болмақ. Әйткенмен ¼ финалда «Вулверхэмптон» командасына құрған тактикасы мен ойын өрнегін бұл жолы тағы көрсетсе, Хулен Лопетеги шәкірттері қарсыласын сөзсіз жеңеді».

Міне, айтқанымыз айдай келді. «Севилья» – финалда!

Алғашқы минуттарда ойын қалай болар екен деп күдіктендік. Себебі, кездесудің 7 минутында «Севилья» қорғаушысы Диего Карлос айып алаңының ішінде МЮ жартылай қорғаушысы Рэшфордтың қақпаға соққы жасауына мүмкіндік беріп, артынша аяғынан шалды. Көп уақыт өтпей бейне-бақылау арқылы бас төреші Феликс Брых 11 метрлік айып добын белгіледі. Фернандеш мүлт кеткен жоқ. Есеп – 1:0, МЮ алда. Осы голдан кейін «нервиондықтар» тез естерін жиып ойынның 26-минутында есепті теңестірді. Сол қапталдан суырылып шыққан Регилон «қызыл сойқандардың» екі қорғаушысынан асырып Сусоға әдемі пас шығарып берді. Сусо ойланбастан бірден сол аяғымен соққы жасап, қақпаның оң жақ бұрышын дәл көздеді. Есеп – 1:1.

Есеп теңескеннен кейін қос команда алма-кезек шабуылдармен алмасып жатты. Сондай қарымта шабуылдардың бірінде «нервиондықтар» есепті еселеп, бұл матчтың нүктесін қойды. Ойынның 78-минутында оң қапталдан Навас айып алаңына әуелетіп асырғаны сол еді, оған бірінші болып жеткен Де Йонг қақпаның дәл ортасына соққы жасап, есепті 2:1-ге жеткізді. Бұдан кейін МЮ ойынды өз қолдарына алып, қанша шабуыл жасаса да нәтиже бермеді. Себебі, оған «Севилья» қақпашысы мен қорғаушылары дайын болып шықты.

Бір қызығы, бұған дейін «Севилья» Еуропа лигасының жартылай финалында бес рет ойнап, барлығында да финалға шыққан және барлығында да жеңіске жеткен. Енді міне, қатарынан 20 матчта жеңілмеген «Севилья» алтыншы мәрте Еуропа лигасының финалына шығып отыр. Ал енді финалда жеңіске жету өздерінің құрған тактикаларына байланысты болмақ.

Статистика:

«Севилья» – «Манчестер Юнайтед» 2-1

Допты иелік ету – 53% – 47%; соққы – 9:20; дәл соққы – 3:8; айып соққы – 16:15; бұрыштама – 3:4; офсайд – 3:0; сары қағаз – 2:3; ойыншы алмастыру – 4:5.

«Севилья»: қақпашы – Боно; қорғаушылар – Регилон, Карлос, Кунте, Навас; жартылай қорғаушылар – Хордан, Фернандо, Банега; шабуылшылар – Окампос, Эн-Несири, Сусо.

«Манчестер Юнайтед»: қақпашы – Де Хеа; қорғаушылар – Ван-Биссака, Линделёф, Магуайр, Уильямс; жартылай қорғаушылар – Фред, Гринвуд, Фернандеш, Погба, Рэшфорд; шабуылшы – Марсьяль.